بۇگىن، 10 ماۋسىم كۇنى تۇستەن بۇرىن پوليتسيا الماتى قالاسىنداعى "استانا"  الاڭى مەن ءاليا -مانشۇك پاركىن قورشاۋعا الدى. تولە بي كوشەسىنە ورنالاسقان الاڭ مەن ونىڭ جانىنداعى ساياباق ارنايى جاساق پەن پوليتسيا قىزمەتكەرلەرىنە تولعان. 

ماڭىنداعى كوشەلەردە ارنايى كولىكتەر قويىلعان. فوتو: QT.

تىلشىلەردىڭ حابارلاۋىنشا، "استانا" الاڭىنا جاقىن ابىلاي حان، قازىبەك بي، بوگەنباي، پانفيلوۆ كوشەلەرىن پوليتسيا باقىلاۋعا الىپ، ارنايى كولىكتەر قويىلعان. سونداي-اق، "ۇلتتىق ۇلان" ساربازدارى پارك پەن الاڭعا جاقىن كوشەلەردى ءۇزىلىسسىز شارلاپ جۇرگەنىن ايتادى.

الاڭ مەن وعان جاقىن پاركتى پوليتسيا باقىلاۋىنا الدى. فوتو: QT

ەستەرىڭىزگە سالا كەتەيىك، كەشە، 9 ماۋسىم كۇنى كەزەكتەن تىس پرەزيدەنت سايلاۋى كەزىندە اتالعان الاڭ ماڭىندا نارازىلىق اكتسياسى وتكەن بولاتىن. رەسمي تاراپتار جاعىنان زاڭسىز دەپ تابىلعان بۇل نارازىلىق شەرۋىن پوليتسيا مەن ارنايى جاساق كۇشپەن تاراتقان بولاتىن. قازاقستانداعى بىرقاتار باق وكىلدەرى پوليتسيانىڭ جۇزدەگەن ادامدى تۇتقىنداعانىن حابارلاعان.

سوڭعى كەلىپ جەتكەن مالىمەتتەرگە قارعاندا، پوليتسيا الاڭداعى ادامداردى ءبىر-بىرلەپ ۇستاي باستاعان.

“The Qazaq Times”