«قازىر ەلگە تۇراقتىلىق ماڭىزدى» - دەپ مالىمدەدى نۇرسۇلتان نازارباەۆ.

نۇرسۇلتان نازارباەۆ قازاقستان حالىقتار اسسامبلەياسى توراعاسىنىڭ ورىنباسارى جانسەيىت تۇيمەباەۆتى قابىلدادى. كەزدەسۋ بارىسىندا نازارباەۆ «ەلگە تۇراقتىلىق ماڭىزدى» ەكەندىگىن ايتتى.

«قازاقستان حالىقتار اسسامبلەياسى قوعامدى بىرىكتىرەتىن قوزعاۋشى كۇش. بارلىق وبلىستاردا قحا جۇمىس ىستەۋدە، دوستىق سارايلارى اشىلۋدا. قازىر ەلگە تۇراقتىلىق ماڭىزدى. تۇراقتىلىقسىز ءبىز بارلىق جەتكەن جەتىستىكتەرىمىزدى جوعالتىپ الامىز. سول سەبەپتى قحا-نىڭ باستى مىندەتى - قوعامدى ءبىر ورتاعا بىرىكتىرۋگە قىزمەت ەتۋ» - دەدى نازارباەۆ.

قازاقستان قوعامىندا جىل باسىنان بەرى ءارتۇرلى جاعدايلار ورىن الۋدا. بيىلعى جىل قاراعاندى قالاسىندا ارمياندار مەن قازاقتار اراسىنداعى كيكىلجىڭمەن باستالعان. اقپان ايىندا ەلوردادا ءورت سالدارىنان اي مەن كۇننىڭ امانىندا ءبىر وتباسىنىڭ بەس بىردەي ءبۇلدىرشىنى كوز جۇمدى. وسىدان كەيىن رەسپۋبليكا بويىنشا كوپ بالالى انالار بيلىككە باسپانا مەن جاردەماقى بەرۋدى تالاپ ەتىپ، ميتينگكە شىقتى. كۇنى كەشە اقوردا الدىنا جۇزگە جۋىق كوپ بالالى انا جينالىپ، پرەزيدەنت پەن پرەمەر-ءمينيستردىڭ حالىق الدىنا شىعىپ، 30 جىلدان بەرى قوردالانعان ماسەلەلەرگە جاۋاپ بەرۋلەرىن تالاپ ەتتى.

"The Qazaq Times"