«Қазір елге тұрақтылық маңызды» - деп мәлімдеді Нұрсұлтан Назарбаев.

Нұрсұлтан Назарбаев Қазақстан халықтар ассамблеясы төрағасының орынбасары Жансейіт Түймебаевты қабылдады. Кездесу барысында Назарбаев «елге тұрақтылық маңызды» екендігін айтты.

«Қазақстан халықтар ассамблеясы қоғамды біріктіретін қозғаушы күш. Барлық облыстарда ҚХА жұмыс істеуде, Достық сарайлары ашылуда. Қазір елге тұрақтылық маңызды. Тұрақтылықсыз біз барлық жеткен жетістіктерімізді жоғалтып аламыз. Сол себепті ҚХА-ның басты міндеті - қоғамды бір ортаға біріктіруге қызмет ету» - деді Назарбаев.

Қазақстан қоғамында жыл басынан бері әртүрлі жағдайлар орын алуда. Биылғы жыл Қарағанды қаласында армяндар мен қазақтар арасындағы кикілжіңмен басталған. Ақпан айында елордада өрт салдарынан ай мен күннің аманында бір отбасының бес бірдей бүлдіршіні көз жұмды. Осыдан кейін Республика бойынша көп балалы аналар билікке баспана мен жәрдемақы беруді талап етіп, митингке шықты. Күні кеше Ақорда алдына жүзге жуық көп балалы ана жиналып, президент пен премьер-министрдің халық алдына шығып, 30 жылдан бері қордаланған мәселелерге жауап берулерін талап етті.

"The Qazaq Times"