ناۋرىز ايى تۋا سالا دۇنيە قارۋلى كۇشتەردىڭ دۇبىرىنە تولدى

ناۋرىز ايى تۋا سالىسىمەن الەم ەلدەرىنىڭ اسكەري ارەكەتتەرى، قارۋلى قيمىلدارى جيىلەۋدە. اقپان ايىنىڭ سوڭىنا قاراي رەسەي مەن ناتو اراسىنداعى جاۋاپتاسۋلار الەمدى دۇرلىكتىرگەن ەدى. شەشىمى تابىلسا دا ءبىتىمى جوق ءسۇريا (سيريا) ماسەلەسى ءالى دە قارۋلى كۇشتەردىڭ شۋىنا تولى. كاسپيدىڭ ارعى بەتىندە ءازىربايجان مەن ارمەنيا اراسىنداعى جانجالدا باسىلماي تۇر. بۇلارعا ەندى دۇنيەنىڭ شىعىسىنان كورەي تۇبەگى جانجالى كەلىپ قوسىلدى.

سايتىمىزدا وڭتۇستىك-سولتۇستىك كورەيالار اراسىنداعى قايشىلىقتار حابارلانىپ كەلەدى. وتكەن ايدىڭ سوڭعى كۇندەرى رەسمي سەۋل تارابى «ساد» (Thaad) جۇيەسىن ورناتاتىن ورىندى تۇراقتاندىرعانىن حابارلاپ ەدى، كوكتەم ماۋسىمىنىڭ العاشقى كۇنىن اقش-كورەيا بىرلەسكەن ارمياسىنىڭ اسكەري وقۋ-جاتتىعۋىمەن باستادى. قازىر تۇبەك جاعدايى سوعىس تۋىلۋدىڭ از-اق الدىندا تۇر دەۋگە بولادى. بۇگىن شەتەل باق-تارىنان رەسەي مەن قىتاي، سولتۇستىك كورەيا «ساد» جۇيەسىنە ورتاق قارسى تۇرۋدى كەڭەسىپ جاتقانى ءمالىم بولدى. سونداي-اق، رەسەي مەن قىتاي ىقپالىندا شانحاي ىنتىماقتاستىق-قاۋىپسىزدىك ۇيىمى ىشىندە دە ءبىر قاتار ارەكەتتەر ءبىلىندى. رەسەي پرەزيدەنتىنىڭ قازاقستان، قىرعىزستان، تاجىكستانداعى بەيرەسمي ساپارى، شانحاي ىنتىماقتاستىق-قاۋىپسىزدىك ۇيىمىنا مۇشە ەلدەردىڭ اسكەري ىستەر وكىلدەرىنىڭ  استاناداعى كەشەگى وتىرىسى. شىعىس پەن باتىستاعى قاۋىرت ءجۇرىپ جاتقان اسكەري ارەكەتتەر توسىن ۇرەي تانىتارلىقتاي.

ورتا شىعىس جانە تاياۋ-شىعىس دۇربەلەڭگە بويى ۇيرەندى دەگەن كۇننىڭ وزىندە، يران مۇسىلمان ەلدەرىن پالەستينا ازاتتىعى ءۇشىن كۇرەسكە شاقىرۋى، اتالعان ءوڭىردىڭ الداعى جىلدارداعى باستى تاقىرىبىن الدىن الا سەزدىرىپ تۇرسا كەرەك. ءيزرايلدىڭ پالەستينانى جاۋلاپ، يسلام ەلدەرىنە جاساعان بۇلىگىن، يران ەش ۋاقىتتا كەشىرە المايتىنىن اشىق ايتىپ وتىر. ءسۇريا، ليتۆا، يراك، مىسىر، ليبيا قاتارلى زامانىندا يسلام ەلدەرى اراسىندا دامۋدان كوش باستاعان ەلدەردىڭ بۇگىنگى تاس-تالقان كۇيى ارتقى شەف يسلام ەلدەرىن ويلاندىرسا كەرەك.

يران اقپاراتتىق اگەنتتىگى، بۇگىن، اقش «دەلتا» ارناۋلى كۇشتەرىنىڭ دايش لاڭكەستىك توبىنىڭ جەتەكشىسى ابۋباكىر ءال-باعداديدى موسۋلدىڭ باتىسىنان شىعارۋعا كۇش سالىپ جاتقانىن حابارلاي كەلىپ، يران يسلام رەسپۋبليكاسىنىڭ ءسۇريا تىنىشتىعىن قالپىنا كەلتىرۋ ءۇشىن جاساعان ەڭبەگىن ءوز اتتارىنا جازىپ الۋدا دەپ سىنعا الدى. نە دەسە دە قازىر قولدان جاسالعان دايش سول جاساۋشىلاردىڭ قولىمەن تالقاندالىپ جاتىر. دايش شابۋىلدارى تولاستاي بەرە تىڭ ءبىر تاقىرىپتىڭ تۋارى انىق. سەبەبى، يزرايل ءوزىنىڭ پالەستيناداعى قالا قۇرىلىستارىن ءالى اياقتاتىپ بولعان جوق.

ال، بىزگە كاسپي ارقىلى تۇتاساتىن كورشى ازەربايجان قارۋلى كۇشتەرى، كەشە تۇستەن كەيىن،  مايدان جەلىسىندە ارمەنيا ارمياسى شتاب پاتەر رەتىندە قولدانعان كەيبىر بەكىنىستەردى تالقانداعان. بۇل تۋرالى انادولى اقپارات اگەنتتىگى حابارلاپ وتىر. ازەربايجان تارابىنىڭ ايتىسىنا قاراعاندا بۇل ارمەنيانىڭ كەلىسىمدى بۇزعانى ءۇشىن قايتارعان جاۋاپتارى بولىپ تابىلادى. الايدا شابۋىل سالدارىنان ولگەن، جارالانعان ادامداردىڭ سانى تۋرالى اقپاراتتى تاراتپادى.

شىعىستا اسكەري دەرجاۆالار كورەي تۇبەگىندە تىرەسكەلى تۇرسا، باتىستا ەكونوميكالىق، يدەولوگيالىق تەكە-تىرەستەر ءۇشىن قاراپايىم حالىق زارداپ شەگۋدە. الەمدى ابىگەرگە سالعان قاقتىعىس ورتالارىنىڭ ءبارى دە قولدان جاسالىپ، قولدان وربىتىلگەن قايشىلىقتار ەكەنىن بايقاۋ قيىن ەمەس. الەمنىڭ بەيبىتشىلىگىن جاقتاعان ءبىز ءۇشىن، بۇلاردىڭ ەش قاتىسى جوقتاي كورىنگەنىمەن، ءالدىنىڭ تاقىمىندا كەتىپ جاتقان ءالسىز ەلدەردىڭ مۇددەلەرى ساباق بولماي ما؟! قازاقستان قورعانۋعا قابلەتتى قارۋلى قوسىنىنىڭ قۋاتىن ءالى دە بولسا ارتتىرۋى كەرەك ەكەنىن الەمنىڭ دۇربەلەڭى دابىل قاعىپ ەسكەرتۋدە.

“The Qazaq Times”