ەۋروپارلامەنت سايلاۋى اياقتالدى

ءتورت كۇنگە سوزىلعان ەۋروپارلامەنت سايلاۋى مارەسىنە جەتتى. سايلاۋعا ەۋروپالىق وداق قۇرامىنان شىعۋعا بەل بۋعان ۇلىبريتانيا دا Brexit ماسەلەسىن رەتتەۋ ماقساتىندا قاتىسقان. بۇل تۋرالى Reuters اگەنتتىگى حابارلادى.

بريۋسسەلدە جاريالانعان سايلاۋدىڭ العاشقى قورىتىندىسى بويىنشا ينتەگراتسيا ياعني ەۋروسكەپتيكتەر مەن وڭشىلداردىڭ تانىمالدىلىعى ارتقان. سايلاۋ ناتيجەسىندە جەتەكشى پارتيا سانالاتىن «ەۋروپا حالىقتىق پارتياسى» باسىم داۋىسقا يە بولدى.

مالىمەتتەر بويىنشا، سوتسياليستەر مەن دەموكراتتاردان قۇرالعان اليانس ەكىنشى ورىندا. اتالعان ەكى پارتيا دا ەۋروپارلامەنتتىڭ بيىلعى سايلاۋىندا از ماندات جيناعان. سول سەبەپتى كوپشىلىك داۋىستى قۇراي المادى. ال ليبەرالدار مەن دەموكراتتاردىڭ ەۋروپا ءۇشىن اليانسى ءۇشىنشى ورىندا تۇر. ولار تاياۋدا فرانتسيا پرەزيدەنتى ەممانۋەل ماكروننىڭ «رەسپۋبليكا مارشىندا» قوزعالىسىمەن بىرىككەن بولاتىن.

سايلاۋ قورىتىندىسىنا سايكەس، ءتورتىنشى ورىنعا «جاسىلدار» پارتياسى، بەسىنشى ورىنعا «ەۋروپالىق كونسەرۆاتورلار مەن رەفورماتورلار» فراكتسياسى ورنىققان. جالپى قورتىندى جاريالانعاننان كەيىن، ەۋروپا حالىقتىق پارتياسىنىڭ كوشباسشىسى مانفرەد ۆەبەر ءوزى جەتەكشىلىك ەتەتىن پارتيانىڭ سوتسياليستەر، ليبەرالدار مەن جاسىلداردىڭ  اراسىنداعى ەۋروپالىق كۇشتەرمەن بىرلەسە ەۋروپاداعى ماسەلەلەردى تالقىلاۋعا دايىن ەكەندىگىن ايتتى. ول سوزىندە: «ەۋروپا حالىقتىق پارتياسى» بولماسا كوپشىلىكتە تۇراقتىلىق بولمايدى. سوندىقتان ءبىز كەلىسىمگە كەلۋگە دايىنبىز. ءبىز بىرلەسە جۇمىس ىستەۋىمىز كەرەك. نەگىزگى يدەيامىز وسى. تۇراقتىلىق جايىندا ايتقان كەزدە، ادامداردىڭ ەۋروپاداعى دەموكراتياعا سەنىمى تۋرالى ايتامىز. ەۋروپارلامەنت – بولاشاق ءۇشىن بارلىق ماسەلەنى بىرلەسە تالقىلاپ، شەشىم شىعاراتىن ورىن»، – دەپ مالىمدەدى.

"The Qazaq Times"