بريتان كورولدىك تەڭىز فلوتىنىڭ HMS Queen Elizabeth اتتى اۆيا-تاسىمال كەمەسى شابۋىلشى توبىمەن العاشقى «جاھاندىق ورنالاسۋ» ساپارىن مامىر ايىندا باستاعالى وتىر. ونداعان يادرولىق زىمىران جاسىرۋلى شاعىن ارال ىسپەتتى تاسىمال كەمەسى ءوزىنىڭ شابۋىل توبىنىڭ قورعاۋىمەن ازياعا اتتانباق. بۇل ساپارىندا ول جاپونيا، كورەيا، ءۇندىستان جانە سينگاپۋر ەلدەرىنە بارادى جانە سول ەلدەردىڭ اسكەري تەڭىز كۇشتەرىمەن بىرلەسكەن جاتتىعۋلاردى دا ورىنداماق.

الەم نازارىن اۋدارتاتىنى Elizabeth اۋە-تاسىمال كەمەسىنىڭ شابۋىل توبىنا كورولدىك تەڭىز فلوتىنىڭ 45 ءتيپتى ەسمينەتستەرى – HMS Defender جانە HMS Diamond, 23 ءتيپتى HMS Kent پەن HMS Richmond فرەگاتتارى، سونداي-اق، ەڭ وزىق F -35B جويعىش ۇشاقتارى، وزگە دە سوعىس كەمەلەرى مەن جاۋىنگەرلىك ۇشاقتارى قوسىلعان. وسىنىڭ ءبارىن قامتىعان ءبىر Elizabeth اۋە-تاسىمال كەمەسىنىڭ سوعىس قۋاتى كەيبىر ورتاشا ەلدەردىڭ تۇتاس ارمياسىنا تەڭ.

اتالعان كەمە توبىنىڭ تەڭىز ساپارى 28 اپتاعا سوزىلادى، 26000 تەڭىز ءميلىن ءجۇزىپ، 40-تان استام ەلدەردەن وتەدى. ولاردىڭ اراسىننان اۋستراليا، كانادا، دانيا، گرەتسيا، يزرايل، ءۇندىستان، يتاليا، جاپونيا، جاڭا زەلانديا، ومان، وڭتۇستىك كورەيا، تۇركيا جانە بىرىككەن اراب امىرلىكتەرىنىڭ اسكەري-اۋە كۇشتەرى مەن اسكەري-تەڭىز كۇشتەرىمەن بىرلەسكەن وپەراتسيالاردى ورىنداماق.

بريتان قورعانىس مينيسترلىگىنىڭ كەشەگى مالىمدەمەسىندە، بۇل «جاھاندىق ورنالاسۋ» ساپارى ءۇندى-تىنىق مۇحيتىنداعى قورعانىس سەرىكتەستىگىن كۇشەيتىپ، ايماقتىڭ قاۋىپسىزدىگىن بەكەم ەتە تۇسەدى. بريتانيا بۇل ايماقتا قورعانىس پەن قاۋىپسىزدىكتى ۇزاق مەرزىمگە قامتاماسىز ەتۋگە نيەتتى.

مۇحيتتار اراسىندا قازىر ءۇندى جانە تىنىق مۇحيتى دەرجاۆالار اراسىنداعى شيەلەنىستىڭ ءتۇيىنى بولىپ تۇر. اسىرەسە، قىتايدىڭ وڭتۇستىك قىتاي تەڭىزى مەن تايۋان بۇعازىندا جاساپ جاتقان ارەكەتتەرى اقش پەن ونىڭ وداقتاستارىن الاڭداتىپ وتىر. ولار بولاشاقتا ەكونوميكالىق دامۋدىڭ جاڭا موتورىنا اينالاتىن وڭتۇستىك شىعىس ازيا ايماعىن قىتايدىڭ ىقپال-قاتەرىنەن قورعاپ قالۋدى كوزدەۋدە. الەمدەگى سۋ جولدارى اراسىندا شىعىس وڭتۇستىك ازياداعى سۋ جولدارى جاھاندىق ەكونوميكانىڭ كۇرە تامىرى قاتارىندا باعالانادى. بۇل ايماقتاعى اشىقتىق پەن تۇراقتىلىققا بريتانيا باستاعان «بەسكوز» ەلدەرى اسا ءزارۋ. وسى مۇددەلەردى قورعاپ قالۋ ءۇشىن بريتان ايماققا قۋاتتى كەمەلەر توبىن اتتاندىراتىنىن بىلتىر جاريا ەتكەن ەدى.

“The Qazaq Times”