قازاقستاننىڭ تۇركياداعى ەلشىلىگى انكارادا الدا كەلە جاتقان كەزەكتەن تىس پرەزيدەنتتىك سايلاۋ مەن وعان دايىندىق شارالارى جونىندە ءباسپاسوز جيىنىن وتكىزدى.

وتىرىسقا تۇركيانىڭ اقپارات اگەنتتىكتەرى، ءىرى مەدياحولدينگ وكىلدەرى قاتىستى. باسقوسۋ بارىسىندا قازاقستاندىق تاراپ باق وكىلدەرىنە قازاقستانداعى پرەزيدەنتتىك سايلاۋ زاڭناماسى، ناۋقانى مەن ۇمىتكەرلەر جايلى جان-جاقتى اقپارات بەرىپ، قوس تاراپ كەزەكتەن تىس پرەزيدەنتتىك سايلاۋدىڭ ءوتۋ بارىسىن تالقىلادى.

كەزدەسۋدە جۋرناليستەر قازاقستانداعى ءدىني احۋال، ورتالىق ازياداعى ىنتىماقتاستىق ءۇردىسى، جىبەك جولى، شانحاي ىنتىماقتاستىق ۇيىمى، قازاقستاننىڭ بۇۇ قاۋىپسىزدىك كەڭەسىندەگى توراعالىعى جانە ەكى ەل اراسىنداعى ساۋدا-ساتتىق تاقىرىپتارى توڭىرەگىندە وي بولىسكەن. تۇركيالىق مەديا قازاقستاندا ءادىل جانە اشىق سايلاۋدىڭ وتۋىنە سەنىم ءبىلدىردى.

ەسكە سالا كەتەيىك، وسى جولى قر وسك جەتى كانديداتتى تىركەدى. ولاردىڭ قاتارىندا «Nur Otan» پارتياسىنان قاسىم-جومارت توقاەۆ، «ۇلت تاعدىرى» ۇلتتىق-پاتريوتتىق قوزعالىسى ۇسىنعان كانديدات ءامىرجان قوسانوۆ، «اۋىل» حالىقتىق-دەموكراتيالىق پاتريوتتىق پارتياسىنان تولەۋتاي راحىمبەكوۆ، قازاقستاننىڭ كوممۋنيستەر پارتياسىنان جامبىل احمەتبەكوۆ، «ۇلى دالا قىراندارى» رەسپۋبليكالىق قوزعالىسىنان ءسادى-بەك تۇگەل، قازاقستان رەسپۋبليكاسىنىڭ كاسىپوداقتار فەدەراتسياسىنان امانگەلدى تاسپيحوۆ جانە «اق جول» قازاقستاننىڭ دەموكراتيالىق پارتياسىنان دانيا ەسپاەۆا بار.

"The Qazaq Times"