انكارادا قازاقستان تاۋەلسىزدىگىنىڭ 30 جىلدىعىنا ارنالعان دوستىق ۆەلوشەرۋ ءوتتى. 

ۆەلوشەرۋ قاتىسقان ەلۋدەن استام سپورتشى انكارا باس كوشەلەرىمەن ءجۇرىپ ءوتتى. 12 شاقىرىمدى ەڭسەرگەن ۆەلوجۇرگىنشىلەر، اتاتۇرىكتىڭ «انىتكابير» ماۆزولەيىنە كەلىپ توقتادى.

شارادا قازاقستاننىڭ تۇركياداعى ەلشىسى ابزال ساپاربەكوۆ: «قازاقستاننىڭ 30 جىلدىعىن ەرەكشە فورماتتا اتاپ ءوتىپ وتىرمىز. العاش رەت، تۇركيادا ۆەلوسپورت قاۋىمداستىعىمەن بىرلەسىپ ۆەلوشەرۋ ۇيىمداستىردىق. پاندەميا جانە قۇربان ايتقا سايكەس كەلگەندىكتەن قاتىسۋشىلار سانىن شەكتەپ، 50-دەن استام توپپەن تۇرىك استاناسىنىڭ كورىكتى جەرلەرىندە ءجۇرىپ ءوتتى»، – دەدى.

اكتسيانى ەلدىڭ ۆەلوسپورت فەدەراتسياسى، ەكى ەلدىڭ بەلسەندى جاستارى مەن ەرىكتىلەرى قولدادى. سونىمەن قاتار اكتسياعا تۇركيا پروۆينتسيالارىنا ۆەلوسيپەدپەن ساياحات جاساعان سپورتشى دامير كوشەەۆ تە قاتىستى.

34 جاستاعى دامير 3 اپتادا ىستامبۇل-بيلەجيك-كۋتاحيا-افيونكاراحيسار-بۋردۋر-انتاليا-كاش-فەتحيە-يزمير-پولاتلى جانە انكارا قالالارىن ءجۇرىپ وتكەن. ۆەلوجۇرگىنشىنىڭ ايتۋىنشا، بۇل ساپارداعى نەگىزگى ماقسات – شاھارلاردا بوي كوتەرگەن اباي ەسكەرتكىشىنە تاعزىم ەتىپ، تۋريستەردىڭ ەڭ كوپ تۇراقتايتىن جەرلەرىندە تۇركىستاندى تانىستىرۋ.

"The Qazaq Times"