فوتو: https://kursiv.kz

قر اقپارات جانە قوعامدىق دامۋ ءمينيسترى داۋرەن اباەۆ 9 مامىردا قازاقستان بويىنشا عالامتوردىڭ بۇعاتتالۋىنا قاتىستى پىكىر ءبىلدىردى.

اباەۆ سوزىندە: «اقپارات جانە قوعامدىق دامۋ مينيسترلىگى بايلانىسقا جاۋاپ بەرمەيدى. مەن قازىر بۇعان بايلانىستى ەشتەڭە ايتا المايمىن. بىراق دەيستۆيتەلنو، پروۆايدەرلەر ايتقانداي، تەحنيكالىق اقاۋلىقتار بولدى. عالامتوردىڭ نە سەبەپتى بۇعاتتالۋىن پروۆايدەرلەردەن سۇراپ، ناقتى جاۋاپ العان ءجون. 9 مامىردا بايقالعان «ينتەرنەتكە دوستۋپ» پروبلەماسى 9 ماۋسىمدا دا قايتالانادى دەپ ويلامايمىن، پروۆايدەرلەر وعان دەيىن ءوز تەحنيكالارىن جونگە كەلتىرەدى دەپ ويلايمىن»، – دەپ جاۋاپ قاتتى.

9 مامىردا قازاقستان بويىنشا عالامتورعا كىرۋ قيىنداپ، توعىز سايتتىڭ جۇمىسى ۋاقىتشا توقتاتىلعان بولاتىن. وسىعان قاتىستى «شەكاراسىز تىلشىلەر» حالىقارالىق جۋرناليستەر قۇقىعىن قورعاۋ ۇيىمى قازاقستانداعى ينتەرنەتتىڭ بۇعاتتالۋىن، ينتەرنەت تسەنزۋرانى سىنعا الدى. اتالعان ۇيىمنىڭ ەۋروپا جانە ورتالىق ازيا بويىنشا ءبولىمىنىڭ جەتەكشىسى دجوحان بير «جەرگىلىكتى حالىقتىڭ اقپارات الۋ قۇقىعىن بۇزۋ فاكتىسىنە ەش اقتاۋ جوق» – دەپ مالىمدەگەن.

ايتا كەتەيىك، جەلى قولدانۋشىلارى سوڭعى جىلدارى عالامتوردىڭ ءجيى بۇعاتتالۋىنا قاتىستى شاعىمدانىپ كەلەدى. بيلىك وكىلدەرى اتالعان ماسەلەگە قاتىستى پىكىرىن «عالامتورداعى اقاۋلىققا بيلىكتىڭ ەش قاتىسى جوق، بۇل پروۆايدەر تاراپىنان شەشىلۋى ءتيىس» – دەپ قىسقا قايىرادى.

"The Qazaq Times"