وزبەكستان ءسوز بوستاندىعى رەيتينگىندە 4 ورىنعا جوعارىلادى. «شەكاراسىز تىلشىلەر» (Reporters Without Borders/RSF) حالىقارالىق ۇكىمەتتىك ەمەس ۇيىمىنىڭ ەسەبىنشە، وڭتۇستىكتەگى كورشى ەل العاش رەت قازاقستاننىڭ الدىنا ءتۇستى.

تاشكەنت 2017 جىلدان بەرى 13 ورىن العا جىلجىپ، بۇگىنگى تاڭدا 156-ورىنعا تۇراقتادى. ۇيىم ەكس-پرەزيدەنت يسلام كارىموۆتىڭ قازاسىنان كەيىن ەلدە ءسوز ەركىندىگىنىڭ اۋجايى «ايتارلىقتاي جاقسارعانىن» اتاپ وتكەن. ۇيىمنىڭ مالىمەتىنشە، جەرگىلىكتى بيلىك قاماۋداعى جۋرناليستەردى بوساتۋ، حالىقارالىق سايتتارعا (Voice of America, Amerika ovozi, BBC Uzbek, Deutsche Welle, Amnesty International, Human Rights Watch, «شەكاراسىز تىلشىلەر» جانە «فەرعانا»)  قويىلعان بۇعاتتى الىپ تاستاۋ، باق وكىلدەرىن تىركەۋدى جەڭىلدەتۋ سەكىلدى وڭ شەشىمدەردى جۇزەگە اسىرعان.

«شەكاراسىز تىلشىلەر» ۇيىمىنىڭ ساراپشىلارى ساياسي پليۋراليزمگە باتىلى جەتكەن ەلدەردە عانا ءسوز ەركىندىگى تولىق ماعىنادا ورنايتىنىن ايتادى. وزبەكستان حالىقارالىق جۋرناليستەرگە ەسىگىن قايتا اشقانى قۋانتادى.

العاشقى ۇشتىككە نورۆەگيا، فينليانديا جانە دانيا كىرسە، سوڭعى بەستىكتى جيبۋتي، قىتاي، ەريترەيا، تۇركمەنىستان جانە سولتۇستىك كورەيا اياقتاعان. ال قازاقستان شە؟..

قازاقستان بىلتىرعا قاراعاندا نەبارى ءبىر ورىنعا عانا العا جىلجىعان، 157-ورىندا. ۇيىمنىڭ ەلدەرگە ارنالعان جەكەلەگەن تۇجىرىمداماسىندا «بيلىك ينتەرنەت، جاڭالىقتار سايتىن، الەۋمەتتىك جەلى مەن مەسسەندجەرلەردى باقىلاۋدى كۇشەيتكەنى» جازىلعان. مۇنداي قورىتىندى كەيىنگى 4 جىلدان بەرى اقپارات ءمينيسترى قىزمەتىن اتقارىپ كەلە جاتقان داۋرەن اباەۆتىڭ كەزىندە جاسالىپ وتىر.

ال ورتا ازياداعى ەڭ ەركىن ءباسپاسوز «نوميناتسياسى» قىرعىزستانعا تيەسىلى. بىشكەكتىڭ مەدياعا قاتىستى «اشىق ءارى مەيىلىنشە ءمولدىر، تولەرانتتى ساياساتىنىڭ ارقاسىندا» ەل 82-ورىندى يەلەنگەن. دەسە دە باياندامادا ءالى كۇنگە دەيىن شەشىمىن تاپپاعان «جۋرناليستىك زەرتتەۋ جۇرگىزۋگە رەسۋرستار مەن اقپاراتتىڭ قولجەتىمسىزدىگى»، «جەمقورلىققا قاتىستى تاقىرىپتىڭ («ماترايموۆتار ءىسى») ءجۋرناليستىڭ جەكە ومىرىنە قاۋىپ ءتوندىرۋى» سياقتى ماسەلەلەر بارى ايتىلىپ، مۇنى شەشۋدىڭ جالعىز جولى – «پرەزيدەنتتى قورعاۋعا باعىتتالعان زاڭدار جويۋ جانە سوت جۇيەسىنىڭ تاۋەلسىزدىگى قامتاماسىز ەتۋ» دەلىنگەن.

سولتۇستىكتە كورشى ورنالاسقان رەسەي اتالعان رەيتينگتە 149-ورىندا. بۇل ەلدە دە باق-قا قىسىم جيىلەي تۇسكەن.

"The Qazaq Times"