فوتو: Zakon.kz

ورتالىق سايلاۋ كوميسسياسى پرەزيدەنتتىككە ۇمىتكەر كانديداتتاردى تىركەۋدى مەرزىمىنەن بۇرىن اياقتادى. بۇل جونىندە وسك توراعاسىنىڭ ورىنباسارى كونستانتين پەتروۆ مالىمدەدى.

مامىر ايىنىڭ 6-ى كۇنى ورتالىق سايلاۋ كوميسسياسىنا قۇجاتتارىن تاپسىرعان 7 ۇمىتكەردىڭ كانديداتۋراسى تىركەلگەن. العاشقىلاردىڭ ءبىرى بولىپ «نۇر وتان» پارتياسىنىڭ وكىلى قاسىم-جومارت توقاەۆ كانديدات كۋالىگىن العان. ودان كەيىن «ۇلى دالا قىراندارى» قوزعالىسىنىڭ ۇكىلەگەن ءۇمىتى سادىبەك تۇگەل، كاسىپوداقتار فەدەراتسياسىنىڭ وكىلى امانگەلدى تاسپيحوۆ، «اق جول» پارتياسىنىڭ كانديداتى دانيا ەسپاەۆ پرەزيدەنتتىككە ۇمىتكەر كۋالىگىن يەلەنگەن.

6 مامىر كۇنى وسك «اۋىل» پارتياسىنىڭ وكىلى تولەۋتاي راقىمبەكوۆتى، قازاقستان كوممۋنيستىك حالىق پارتياسىنىڭ ۇمىتكەرى جامبىل احمەتبەكوۆتى، «ۇلت تاعدىرى» قوزعالىسىنىڭ كانديداتى ءامىرجان قوسانوۆتى پرەزيدەنتتىككە ۇمىتكەر رەتىندە تىركەگەن.

مامىر ايىنىڭ 2-ءى كۇنى «حالىق دەموگارفياسى» بىرلەستىگىنىڭ ۇمىتكەرى جۇماتاي اليەۆ قازاق تىلىنەن ەمتيحان تاپسىرىپ، وتپەي قالعان. ورتالىق سايلاۋ كوميسسياسى اليەۆتىڭ قازاق ءتىلىن جەتىك مەڭگەرمەگەندىگىن ايتىپ، ونى قول جيناۋ كەزەڭىنە وتكىزبەي تاستاعان.

ۇمىتكەرلەردى تىركەۋ ۋاقىتى زاڭ بويىنشا 11 مامىر كۇنى ساعات 18:00-دە اياقتالۋى ءتىس بولعان. ءدال وسى ۋاقىتتان باستاپ كانديداتتار سايلاۋ الدى ۇگىت-ناسيحات جۇمىستارىن جۇرگىزۋگە كىرىسەدى.

ايتا كەتەتىن ءبىر جايت، پرەزيدەنتتىك سايلاۋعا جسدپ «اقيقات» وپپوزيتسيالىق پارتياسى 26 ءساۋىر كۇنى وتكەن قۇرىلتايىندا بايكوت جاريالاعان. پارتيا اتىنان پرەزيدەنتتىككە ۇسىنىلعان ەرمۇرات باپي «بۇل جولعى سايلاۋدىڭ بۇرىنعى سايلاۋلاردان وزگەشەلىگى جوق» ەكەندىگىن ايتىپ، «سايلاۋعا قاتىساتىن كەزەكتى قۋىرشاق كانديداتتار اراسىندا بولعىسى كەلمەيتىندىگىن» جەتكىزگەن.

قازاقستاندا كەزەكتەن تىس پرەزيدەنت سايلاۋى ماۋسىم ايىنىڭ 9-ى كۇنى وتەدى.

"The Qazaq Times"