«الەم تىنىشتىعى اقش – رەسەي قارىم-قاتىناسىنا بايلانىستى»

رەسەيدىڭ اقش-تاعى ەلشىسى اناتولي انتونوۆ ۆۆس-گە سۇحبات بەرىپ، ترامپ سانكتسيالارىنىڭ ماسكەۋ مەن ۋاشينگتون قارىم-قاتىناسىنا ىقپالى، كونگرەستەگى روبەرت ميۋللەردىڭ بايانداماسى، رەسەي مەن قىتايدىڭ قاتىسۋىمەن يادرولىق قارۋدى شەكتەۋ تۋرالى جاڭا شارتتىڭ جۇزەگە اسۋى سىندى تاقىرىپتار اياسىندا اڭگىمە وربىتكەن.

انتونوۆ سۇحباتىندا يادرولىق كەلىسىمشارت ماسەلەسىنىڭ بىرجاقتى قولداۋ تاپپايتىندىعىن جانە رەسەي ەكونوميكالىق، يادرولىق، ديپلوماتيالىق قارىم-قاتىناستا امەريكامەن تىعىز بايلانىس جاساۋعا مۇددەلى ەكەندىگىن ايتقان. ەندىگى كەزەكتە رەسەي ەلشىسىنىڭ پىكىرىنە زەر سالساق.

«ەلشى رەتىندە مەن ءاردايىم نەگىزگى ءبىر جايتتى اتاپ كورسەتەر ەدىم: جەتەكشى يادرولىق مەملەكەت كوشباسشىلارىنىڭ ستراتەگيالىق قاۋىپسىزدىك ماسەلەلەرىن تالقىلاۋى وتە ماڭىزدى. ولاردىڭ قانشالىقتى ءجيى سويلەسۋى الەم حالقىنىڭ سونشالىقتى تىنىش ۇيىقتايتىنىن بىلدىرەدى. ياعني الەم تىنىشتىعى اقش پەن رەسەي قارىم-قاتىناسىنا بايلانىستى. دەگەنمەن، امەريكا – رەسەي قارىم-قاتىناسى ۋشىعا تۇسكەن سايىن، پرەزيدەنتتەر ءجيى سويلەسپەيتىن بولدى.

ميۋللەردىڭ كونگرەستە جاساعان بايانداماسى – رەسەي مەن اقش قارىم-قاتىناسىن ۋشىقتىرۋدىڭ بىردەن-ءبىر ءادىسى. ءبىز ارقاشان جاقسى بايلانىستاردى قولدايمىز. اتاپ ايتقاندا، رەسەي قاۋىپسىزدىك كەڭەسىنىڭ باسشىسى نيكولاي پلاتونوۆيچ پاترۋشەۆ ترامپتىڭ ۇلتتىق قاۋىپسىزدىك جونىندەگى كەڭەسشىسى دجون بولتونمەن بىرنەشە رەت كەزدەستى  جاقىندا ۋاشينگتونعا ءسىم باسشىسىنىڭ ورىنباسارى يگور مورگۋلوۆ جانە رەسەي پرەزيدەنتىنىڭ اۋعانستانداعى ارنايى وكىلى زامير كابۋلوۆ كەلدى. ولار كحدر، اۋعانستان ماسەلەلەرىن بىرگە تالقىلادى.

رەسەي تاراپى ۋاشينگتوندا ءجيى ايتىلاتىن كوپتەگەن ايىپتاۋلارعا قاراماستان، ءسۇريا بويىنشا ماڭىزدى اسكەري بايلانىستاردى ساقتاۋعا نيەتتى. ءبىزدىڭ جاۋىنگەر-ارميا گەنەرالى، رەسەي باس شتابىنىڭ باسشىسى ۆالەري گەراسيموۆ جانە گەنەرال، اقش شتابتار باستىقتارى بىرىككەن كوميتەتىنىڭ توراعاسى دجوزەف دانفورد سۇرياداعى جاعداي تۋراسىندا كەزدەسۋلەر وتكىزىپ تۇرادى. بارشاڭىزعا بەلگىلى، ۆ.ءپۋتيننىڭ حەلسينكيدەگى بىرلەسكەن ءباسپاسوز ءماسليحاتىندا ايتقان كوپتەگەن يدەيالارى ىسكە اسىرىلماعان. سول سەبەپتى، مەن بارلىق جوسپاردى قايتادان جاساي الاتىنىمىزعا سەنىمدىمىن.

بۇگىنگى كۇنى سنۆ-3 شارتىنىڭ نەمەن اياقتالاتىندىعى شەشىلگەن جوق. بىزدە امەريكالىقتار تاراپىنان وسى شارتتىڭ كەيبىر ەرەجەلەرى قالاي جۇزەگە اسىرىلىپ جاتقاندىعىنا قاتىستى پروبلەمالار بار. جاڭا شارت تۋرالى كەلىسسوزدەردىڭ فورماتى ەشتەڭە شەشپەيدى. ساراپشى رەتىندە ايتارىم، يادرولىق قارۋسىزدانۋ بويىنشا ەشقانداي كوپجاقتى ۋاعدالاستىق رەسمي تانىلعان بەس يادرولىق دەرجاۆانىڭ (اقش، ۇلىبريتانيا، فرانتسيا، قىتاي، رەسەي) قاتىسۋىنسىز جۇزەگە اسپايدى. قوس تاراپقا كاسىبي كەزدەسۋ اسا قاجەت. كەلىسىمشارت اياسىندا ەكى جاقتى كونسۋلتاتيۆتىك كوميسسيا جۇمىس ىستەيدى، وندا وسى شارتقا قاتىستى بارلىق ماسەلەلەر شەشىلەدى. كەزدەسۋ جەنەۆادا وتەدى، بىراق بۇل تۋرالى كوپ ايتپايمىز. كەيبىر ناتيجەنى جاريالاۋ ءۇشىن كوپ جۇمىس ىستەۋ كەرەك».

"The Qazaq Times"