فوتو: Zakon.kz

ەكى كۇندە 120 مىڭ قول جيناعان ۇمىتكەر كانديدات رەتىندە تىركەلدى.

«اۋىل» پارتياسى اتىنان پرەزيدەنتتىك سايلاۋعا قاتىسىپ جاتقان تولەۋتاي راقىمبەكوۆ  6 مامىر كۇنى كانديدەت رەتىندە تىركەلدى. ورتالىق سايلاۋ كوميسسياسى راقىمبەكوۆتىڭ سايلاۋ الدى شتابى جيناعان 122 309 قولدىڭ 120 754-ءىن جارامدى دەپ تانىعان.

ۇمىتكەردىڭ ءوزى قول جيناۋ ناۋقانىنا بايلانىستى:

«ءبىزدىڭ پارتيانىڭ 320 مىڭ مۇشەسى بار. سوندىقتان قول جيناۋ قيىن بولعان جوق. مامىر ايىنىڭ 1-ءى مەن 2-ءى ارالىعىندا قول جيناپ، 3-ءى كۇنى دايىن بولدى» - دەدى.

قازاقستاندا كەزەكتەن تىس پرەزيدەنت سايلاۋى 9 ماۋسىمدا وتەدى. كانديداتتاردى تىركەۋ مامىر ايىنىڭ 11-ءى كۇنى اياقتالادى. قازىرگە دەيىن پرەزيدەنتتىككە ۇمىتكەر رەتىندە جەتى ادام ءوز كانديداتۋرالارىن ۇسىنعان. اتاپ ايتقاندا:

«ۇلت تاعدىرى» قوزعالىسى – ءامىرجان قوسانوۆ.

«نۇر وتان» پارتياسى – قاسىم-جومارت توقاەۆ.

قازاقستان كاسىپوداقتار فەدەراتسياسى – امانگەلدى تاسپيحوۆ.

«اق جول» پارتياسى – دانيا ەسپاەۆا.

«ۇلى دالا قىراندارى» قوزعالىسى – سادىبەك تۇگەل.

«اۋىل» پارتياسى – تولەۋتاي راقىمبەكوۆ.

قازاقستان كوممۋنيستىك حالىق پارتياسى – جامبىل احمەتبەكوۆ.

"The Qazaq Times"