ءامىرجان قوسانوۆ: ءبىز سايلاۋ تۋرالى زاڭدى ءسوزسىز وزگەرتەمىز

پرەزيدەنتتىككە ۇمىتكەر ءامىرجان قوسانوۆ ءباسپاسوز ءماسليحاتىن وتكىزدى.

بۇگىن ەلوردادا «ۇلت تاعدىرى» قوزعالىسى اتىنان پرەزيدەنت سايلاۋىنا قاتىسىپ جاتقان وپپوزيتسيالىق ساياساتكەر ءامىرجان قوسانوۆ باق وكىلدەرىمەن كەزدەسىپ، سۇراقتارىنا جاۋاپ بەردى. ول سوڭعى ۋاقىتتارى قوعامدا قىزۋ تالقىلانىپ جاتقان جسدپ پارتياسىنىڭ سايلاۋعا بايكوت جاريالاۋىنا، ءوزىنىڭ «ۇلت تاعدىرى» اتىنان كانديدات بولىپ ۇسىنىلۋىنا قاتىستى مالىمدەمە جاسادى.

«الدىندا قوعامدا ۇلكەن پىكىر-تالاس بولدى. الەۋمەتتىك جەلىدە، دەموكراتيالىق كۇشتەر اراسىندا «وسى سايلاۋعا قاتىسۋ كەرەك پە، كەرەك ەمەس پە؟» - دەپ. ماسەلەن ءبىزدىڭ جسدپ-داعى ارىپتەستەرىمىز بۇل سايلاۋعا بايكوت جاريالادى. بىراق دەموكراتيالىق كۇشتەردىڭ باسىم كوپشىلىگى، ونىڭ ىشىندە دوس كوشىم باسقاراتىن «ۇلت تاعدىرى» قوزعالىسى ءوزىنىڭ جيىنىن جاساپ، مەنى كانديدات رەتىندە ۇسىندى. سوندىقتان ءبىز وسى سايلاۋعا كەلىپ تۇرمىز. بەتىمىز اشىق. زاڭ بۇزبايمىز. زاڭدى ءبىز وزگەرتۋدى تالاپ ەتەمىز. ءبىز پرەزيدەنت بولعاندا، پارلامەنتكە كەلگەندە سايلاۋ تۋرالى زاڭدى ءسوزسىز وزگەرتەمىز. بىراق قولدا بارىن پايدالانىپ، بۇگىننەن باستاپ قول جيناۋعا كىرىسەمىز» - دەدى قوسانوۆ.

ەستەرىڭىزگە سالايىق، كەشە ءتىل كوميسسياسىنىڭ توراعاسى مىرزاتاي جولداسبەكوۆ ءامىرجان قوسانوۆتىڭ ءتىل سىناعىنان سۇرىنبەي وتكەندىگىن جانە قازاق ءتىلىن ەركىن مەڭگەرگەندىگىن مالىمدەگەن. قوسانوۆتىڭ ءوزى ءتىل سىناعىندا «تمد تاريحى جانە بۇگىنى» تاقىرىبىندا شىعارما جازعاندىعىن، قادىر مىرزاليەۆتىڭ ولەڭدەرىن وقىپ، «ونەر ءبىلىم بار جۇرتتا» تاقىرىبىندا وي-تولعاۋ ايتقاندىعىن جەتكىزگەن.

قازاقستاندا كەزەكتەن تىس پرەزيدەنت سايلاۋى ماۋسىم ايىنىڭ 9-ى كۇنى وتەدى.

"The Qazaq Times"