قازاقستان پرەزيدەنتى قاسىم-جومارت توقاەۆ. فوتو: https://turantimes.kz

قازاقستان مەن گفر سىرتقى ىستەر مينيسترلىكتەرى پرەزيدەنت قاسىم-جومارت توقاەۆتىڭ گەرمانياعا ساپارىنىڭ كۇن ءتارتىبىن ازىرلەۋگە كىرىستى.

قازاقستان سىرتقى ساياسي ۆەدومستۆوسىنىڭ رەسمي وكىلى ايبەك سمادياروۆتىڭ مالىمەتىنشە، كەلىسسوزدەردىڭ كۇن تارتىبىنە مەملەكەت باسشىسى قاسىم-جومارت توقاەۆتىڭ گەرمانياعا الداعى رەسمي ساپارى، ورتالىق ازيا بويىنشا ەو ستراتەگياسىن ىسكە اسىرۋ، سونداي-اق وڭىرلىك قۇرىلىمدار مەن حالىقارالىق ۇيىمدار اياسىندا ەكى ەلدىڭ ءوزارا ءىس-قيمىلى جوسپارلانعان.

گەرمانيا قازاقستاننىڭ ەڭ ءىرى ءۇش ساۋدا ارىپتەسىنىڭ قاتارىنا كىرەدى. 2017 جىلى شىلدەدە قازاقستان مەن گەرمانيا ىسكەرلىك كەڭەسىنىڭ وتىرىسىندا قۇنى 872 ملن ەۋروعا باعالاناتىن 21 كەلىسىمگە قول قويىلدى. ال بيىل 25 ناۋرىزدا گەرمانيا قارۋلى كۇشتەرىنىڭ اسكەري قيمىلداردى مودەلدەۋ جانە اسكەري مەديتسينا سالاسىندا تسيفرلىق مونيتورينگ جۇيەسىن پايدالانۋدى ۇيرەنۋ ماقساتىندا ارنايى جاساق بولىمشەلەرى اراسىندا تاجىريبە الماسۋ تۋرالى كەلىسىمدەرگە قول قويىلدى. بۇگىنگە دەيىن گەرمانيا قازاقستان ەكونوميكاسىنا شامامەن 8,5 ميلليارد دوللار قۇيعان. وسى رەتتە قر سىرتقى ىستەر ءمينيسترىنىڭ ورىنباسارى ەرمەك كوشەرباەۆ: «سىرتقى ىستەر مينيسترلىگىنە جاڭادان ءبىر فۋنكتسيالار بەرىلگەن. بۇل – ينۆەستيتسيانى تارتۋ جانە ەكسپورتتى ىلگەرىلەتۋ. سول جونىندە ءۇش مەملەكەت، جالپى ۇلكەن مەملەكەتتەر اتالادى. ول اقش، جاپونيا جانە گەرمانيا سياقتى جوعارى تەحنولوگيا جانە ونەركاسىبى بار ەلدەر. جاڭادان شىققان تەحنولوگيالاردى ءوز ەلىمىزگە تارتۋ قاجەت. وسىنداي پلاتفورمالاردا بيزنەس قوعاممەن كەزدەسىپ، جاڭا مۇمكىندىكتەر اشىلادى، سول مۇمكىندىكتەردى پايدالانۋ كەرەكپىز»، – دەپ مالىمدەدى.

ايتا كەتەيىك، پرەزيدەنتتىك لاۋازىمىنا كىرىسكەلى ق.توقاەۆ اق ءۇي باسشىسى دونالد ترامپ، شۆەيتساريا پرەزيدەنتى ۋلي ماۋرەر، ۋكراينا پرەزيدەنتى ۆلاديمير زەلەنسكي، گرۋزيا پرەزيدەنتى سالومە زۋرابيشۆيلي سىندى ساياساتكەرلەرمەن كەزدەستى.

"The Qazaq Times"