وسپان باتىر 120 جىل: ستامبۋلدا وسپان باتىرعا ارنالعان حالىقارالىق كونفەرەنتسيا ءوتتى

وسپان باتىر – 120 جىل. ۇلتازاتتىق كوتەرىلىسىنىڭ جەتەكشىسى وسپان باتىر ءسىلامۇلىنىڭ 120 جىلدىق مەرەيتويى حالىقارالىق دەڭگەيدە اتالىپ وتىلدە. وسى اپتادا باتىردى ەسكە الۋ شارالارى تۇركيادا جالعاسىن تاپتى.

ستامبۋل قالاسىنداعى ميمار سينان ۋنيۆەرسيتەتىندە 25 ءساۋىر كۇنى وسپان باتىرعا ارنالعان حالىقارالىق كونفەرەنتسيا ءوتىپ، باتىر ەسىمى ۇلىقتالدى. وسپان باتىردى ەسكە الۋعا ارنالعان شارا اتالعان ۋنيۆەرسيتەتتىڭ  تاريح فاكۋلتەتىنىڭ قولداۋىمەن، تاريح عىلىمدارىنىڭ دوكتورى ابدىۋاقاپ قارانىڭ ۇيىمداستىرۋىمەن وتكەن. كونفەرەنتسياعا قازاقستان مەن تۇركيا جانە ەۋروپانىڭ ءار ەلىنەن كەلگەن تاريحشى، جازۋشى عالىمدار، قوعام قايراتكەرلەرى، ديپلوماتتار جانە تۇركيا مەن ەۋروپادا تۇراتىن قازاق دياسپوراسىنىڭ وكىلدەرى قاتىستى.

وسپان باتىر تۋرالى اتا جۇرتتا شىعارىلعان كىتاپتار تۇركياداعى زەرتتەۋشىلەر مەن وقىرماندارعا تارتۋ ەتىلدى.

كونفەرەنتسيادا قازاقستاننىڭ تۇركياداعى بۇرىنعى وكىلەتتى ەلشىسى، ساياساتكەر بالتاش تۇرسىنباەۆ، ش. ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى زيابەك قابىلدينوۆ، ت.ع.د. ابدىۋاقاپ قارا، «ەر جانىبەك» حالىقارالىق قوعامدىق قورىنىڭ پرەزيدەنتى جەڭىس تۇركيا، جازۋشى ءجادي شاكەنۇلى، بەلگىلى دارىگەر، اقىن-كومپوزيتور تولقىن اقان، سونداي-اق، وسپان باتىر جانە تۇركيا قازاقتارى تۋرالى العاش دوكتورلىق ديسسەرتاتسيا قورعاعان عىلىم دوكتورلارى دوسجان توقتار ومىرقۇل مەن تەكين تۋنجار قاتارلى قاتىسۋشىلار ءسوز تىزگىنىن ۇستاپ، وسپان باتىرعا ارنالعان جيىننىڭ مازمۇنىن كەڭەيتتى.

"ەر جانىبەك" قورىنىڭ پرەزيدەنتىنە سىيلىق تابىس ەتىلدى.

سونىمەن بىرگە، القالى جيىندا التايدان انادولىعا جەتكەن كوشتىڭ كۋاگەرى دالەلحان جانالتاي ەستەلىكتەرىنىڭ تۇرىك تىلىندەگى جاڭا كىتابىنىڭ تۇساۋى كەسىلىپ، جيىن قوناقتارىنا ۇسىنىلدى. اقىن تولقىن اقانۇلى "وسپاننىڭ ارمانىن ارقالاپ قينالىپ جۇرگەن ۇرپاقتارىنا يە بولعان تۇركى حالقىنا راحمەت رەتىندە "تۇركى ەلىم" اتتى جىرىن وقىدى.

وسپان باتىر ءسىلامۇلى – قازاق ۇلتازاتتىق كوتەرىلىسىنىڭ وتكەن عاسىرداعى كورنەكتى جەتەكشىلەرىنىڭ ءبىر ءھام بىرەگەيى. ول التايداعى ۇلتازاتتىق كوتەرىلىسىنە جەتەكشىلىك ەتە وتىرىپ، ەكى بىردەي قىزىل يمپەرياعا، گومين ۇكىمەتىنە جانە كەڭەس وداعى تارابىنان قۇرىلعان قۋىرشاق ۇكىمەت شتر-عا قارسى كۇرەس جاساعان ۇلت قاھارمانى. بيىل وسپان باتىردىڭ دۇنيەگە كەلگەنىنە 120 جىل تولۋىنا وراي، «ەر جانىبەك» حالىقارالىق قوعامدىق قورى باس بولىپ، وزگە دە قوعامدىق ۇيىمداردىڭ ات سالىسۋىمەن جىل بويى مەرەكەلىك شارالار وتكىزىلمەك.

“The Qazaq Times”