بىرعانىم ءايتىموۆا: «باسقا كانديداتتارعا قيىنداۋ بولادى»

قر پارلامەنت سەناتىنىڭ دەپۋتاتى بىرعانىم ءايتىموۆا پرەزيدەنتتىك سايلاۋعا مەملەكەت باسشىسى قاسىم-جومارت توقاەۆ قاتىساتىندىقتان، وزگە كانديداتتارعا قيىنداۋ بولادى دەگەن پىكىر ءبىلدىردى.

سەناتور ءوز سوزىندە «Nur Otan» پارتياسىنىڭ اتىنان پرەزيدەنت سايلاۋىنا قاسىم-جومارت توقاەۆتىڭ كانديداتۋراسى ۇسىنىلاتىنىن ىشتەي جورامالداعانىن جانە سەزدە باستى كانديدات ءۇشىن داۋىس بەرگەندىگىن ايتتى. سەزدەن كەيىن ءايتىموۆا: «مەنىڭشە، باسقا كانديداتتارعا قيىنداۋ بولادى. سەبەبى قاسىم-جومارت توقاەۆ – ءوز جۇمىسىنا دا، شەشىمدەرىنە دە بەرىك ادام. ول حالىقارالىق دەڭگەيدە دە سولاي. بۇۇ-دا جۇمىس ىستەگەندە ءوزىن كاسىبي مەنەدجەر رەتىندە كورسەتە ءبىلدى. اتالعان ۇيىمنىڭ جەنەۆاداعى بولىمشەسىن جاڭعىرتۋعا ۇلكەن ۇلەس قوستى. سونداي-اق، وتە جاۋاپتى، ساۋاتتى. بارلىق سالالاردى جاقسى بىلەدى. سول سەبەپتى ونى «reliable» رەتىندە مويىندادى. ول كەز كەلگەن باعدارلامانى باسقارۋدى عانا ەمەس، ونى ىسكە اسىرۋ تەتىكتەرىن دە بىلەدى»، – دەپ مالىمدەدى.

ايتا كەتەيىك، بۇگىن «نۇر وتان» پارتياسىنىڭ قۇرىلتايىندا قر تۇڭعىش پرەزيدەنتى نۇرسۇلتان نازارباەۆ 9 ماۋسىمدا وتەتىن كەزەكتەن تىس پرەزيدەنت سايلاۋىنا پارتيا اتىنان قاسىم-جومارت توقاەۆتىڭ كانديداتۋراسىن ۇسىناتىنىن مالىمدەدى. كەيىننەن ونىڭ بۇل ۇسىنىسىن پارتيا مۇشەلەرى ءبىر اۋىزدان ماقۇلدادى. جيىننان سوڭ، كونستيتۋتسيالىق كەڭەس مەملەكەت باسشىسى قاسىم-جومارت توقاەۆتىڭ ءوتىنىشىن قاراۋعا كىرىسكەنىن مالىمدەدى.

"The Qazaq Times"