فوتو: https://cdnimg.rg.ru

بەلارۋس ۇكىمەتى رەسەيدەن تاسىمالداناتىن مۇنايدىڭ ساپاسىز ەكەندىگىن ايتتى. بۇل تۋرالى Politico حابارلادى.

بەلارۋس «بەلنەفتەحيم» كونتسەرنىنىڭ وكىلى مارينا كوستيۋچەنكو رەسەيلىك Urals ەكسپورتتىق قوسپاسىنىڭ ساپاسى سىن كوتەرمەيتىندىگىن ايتىپ، شاعىمداندى. اسىرەسە، «گومەلترانسنەفت درۋجبا» ماگيسترالدى مۇناي قۇبىرى ۋچاسكەسىنە ترانزيتپەن كەلىپ تۇسەتىن مۇنايدىڭ ناشارلاۋى بەلارۋس ۇكىمەتىنە قارجىلىق قيىندىقتار تۋعىزىپ وتىر. مالىمەتتەر بويىنشا، قوسپانىڭ قۇرامىندا ول مۇناي وڭدەۋ زاۋىتتارى جۇمىسىنىڭ تەحنولوگيالىق رەجيمىن بۇزاتىن حلورلى ورگانيكالىق قوسىلىستار بار.

مۇناي ۇلگىلەرى «گومەلترانسنەفت درۋجبا» ااق زەرتحاناسىمەن بەلورۋسسياداعى رەسەيلىك كومپانيا وكىلىنىڭ قاتىسۋىمەن زەرتتەلگەن. وسىعان بايلانىستى بەلورۋسسيا «ترانسنەفت» اق وكىلدەرىنە شاعىم ءتۇسىرىپ، رەسەيلىك مقنايدى پايدالانىپ وتىرعان وزگە دە مەملەكەتتەرگە ەسكەرتۋ جاساعان.

وسى ۋاقىتقا دەيىن بەلارۋس رەسەيدەن مۇناي ونىمدەرىن ساتىپ الىپ، ەكسپورتتاپ كەلگەن. ەندى رەسەي وزىنە قاۋىپ بولعان ەكونوميكالىق داعدارىستى ەڭسەرۋ ءۇشىن، مۇناي باعاسىن ءوسىرۋ تۋرالى شەشىم شىعاردى. ياعني ماسكەۋ تاراپى 2024 جىلى بەلارۋس يمپورتتايتىن مۇنايعا باج سالىعىن سالاتىنىن ايتتى. وسى مالىمدەمەدەن كەيىن مينسك پەن ماسكەۋ قاتىناسىنا سىزات تۇسە باستادى.

12 ساۋىردە بەلارۋس ۆيتسە-پرەمەرى يگور پەتريشەنكو پرەزيدەنت الەكساندر لۋكاشەنكوعا بەلارۋس اۋماعى ارقىلى وتەتىن رەسەيدىڭ «درۋجبا» مۇناي قۇبىرىنا شەكتەۋ قويۋدى ۇسىندى. پەتريشەنكونىڭ سوزىنشە، مۇناي قۇبىرى وسىدان جارتى جىل بۇرىن جوندەۋ جۇمىستارىنان ءوتۋى ءتيىس بولعان. بىراق ول ۋاقىتتا ارىپتەستىك جونىندەگى كەلىسىمگە سايكەس ول كەيىنگە قالدىرىلعان. قازىرگى تاڭدا ەكولوگيالىق ماسەلەلەرگە بايلانىستى قۇبىرعا شەكتەۋ قويۋ قاجەت نەمەسە مۇناي تاسىمالىن توقتاتۋ كەرەك.

سونىمەن قاتار، الەكساندر لۋكاشەنكو جەرگىلىكتى اقپارات قۇرالدارىنا سۇحبات بەرىپ: «ەگەر دە ماسكەۋ قارا التىن باعاسىن قىمباتتاتسا، مينسك ءىرى كولەمدە وتەماقى تالاپ ەتەدى. قازىر رەسەيدىڭ جاقىن وداقتاسىنان ايىرىلۋ قاۋپى بار جانە وسىنى پايدالانىپ بەلارۋستى وزىنە قوسامىن دەپ ويلاماسىن»، – دەگەن بولاتىن. مينسكتىڭ شاعىمىنا قاتىستى ماسكەۋ رەسمي مالىمدەمە جاساعان جوق.

 

"The Qazaq Times"