دۇيسەنبىدە قازاقستاننىڭ ەنەرگەتيكا مينيسترلىگى اتىراۋ مۇناي وڭدەۋ زاۋىتىن جوندەۋ جۇمىستارى 2022 جىلعا اۋىستىرىلعانىن حابارلادى.                                      

«مۇناي ونىمدەرى نارىعىنداعى قازىرگى جاعدايعا بايلانىستى اتىراۋ ءموز جوندەۋ مەرزىمىن كەلەسى جىلعا اۋىستىرۋ تۋرالى شەشىم قابىلداندى»، – دەلىنگەن ۆەدومستۆو حابارلاماسىندا.

اقپاراتقا قاراعاندا، تامىز-قىركۇيەك ايلارىندا قازاقستاندا ديزەل وتىنى نورمادان تىس كوپ تۇتىنىلعان. ءۇش بىردەي ءموز اتالعان توعىز ايدا 3,7 ملن توننا ءونىم وندىرگەن. بيلىك انومالدى سۇرانىستىڭ​ كۇرت ارتۋ سەبەبىن «ديزەل وتىنىنىڭ باعاسى تومەن بولعاندىقتان، ترانزيتتىك جۇك كولىكتەرى​نىڭ اعىنى جاپپاي ىشكى نارىققا جۇگىنۋىنە» بايلانىستى تۇسىندىرەدى.

نارىقتى تەز ارادا تۇراقتاندىرىپ، ەلدى ساپالى وتىنمەن قامتاماسىز ەتۋگە ۋادە ەتكەن مينيسترلىك قازىر جۇيەنى مەحانيكالىق رەجيمدە، «قولمەن باسقارا» باستاعانىن مالىمدەدى.

«قازمۇنايگاز» ۇك اق باسقارما توراعاسىنىڭ ورىنباسارى دانيار تيەسوۆ رەسمي دەرەگىنشە، قازىر كۇن سايىن شىمكەنت زاۋىتىندا شامامەن 5,5 مىڭ توننا، اتىراۋ زاۋىتىندا 4,4 مىڭ تونناعا جۋىق ديزەل وتىنى ءوندىرىلىپ جاتىر.

​سونىمەن قوسا، تيەسوۆتىڭ ايتۋىنشا، قىركۇيەك ايىندا ەگىن جيناۋ ناۋقانىنا وتىنىمدەر تولىعىمەن جابىلعانىن، ديقاندارعا ديزەل وتىنى جەڭىلدىكپەن​ ساتىلعان.

بيىل قاڭتار-قىركۇيەك ايلارىندا ءبىر عانا اتىراۋ ءموز 4 ملن توننا مۇناي وڭدەگەن، ودان 1,1 ملن توننا ديزەل وتىنى مەن 935 مىڭ توننا جانارماي وندىرىلگەن. وسى قارقىندى وتىن تاپشىلىعى كەزىندە تومەندەتىپ الماس ءۇشىن «مۇناي استاناسىنداعى» ىرگەلى زاۋىت ۇزدىكسىز جۇمىسىن ىستەۋگە ءتيىس. ەنەرگەتيكا ءمينيسترى ماعزۇم مىرزاعاليەۆ مۇناي وڭدەۋشى كومپانيالاردىڭ باسشىلارىنان كاسىپورىنداردىڭ ۇزدىكسىز جۇمىسىن قامتاماسىز ەتۋدى تالاپ ەتتى دەلىنگەن رەسمي اقپاراتتا.

اتىراۋداعى زاۋىتتىڭ باس ديرەكتورى ارمان قايردەنوۆ «ىشكى نارىقتى ديزەلمەن قامتاماسىز ەتۋ ماقساتىندا جوسپارداعى قوندىرعىلاردى جوندەۋ مەرزىمى شەگەرىلىپ، باسقا ۋاقىتقا اۋىستىرىلادى» دەدى. جوندەۋ مەرزىمىن اۋىستىرۋ «جىل سوڭىنا دەيىن قوسىمشا 82 251 توننا ديزەل وتىنىن وندىرۋگە مۇمكىندىك بەرەدى».

وسىعان دەيىن كوكتەمنىڭ باسىندا مينيسترلىك شىمكەنت پەن پاۆلودارداعى ەكى مۇناي وڭدەۋ زاۋىتى جۇمىسىن ۋاقىتشا توقتاتىپ،  جوندەۋ كەزىندە بەنزين تاپشىلىعى بولمايدى دەپ ۋادە بەرگەن. ءىس جۇزىندە قاراپايىم ديزەل وتىنىنىڭ ءوزى شارىقتاپ كەتتى. بيىل جازدا توقاەۆ 2018 جىلى عانا زاۋىت كۇردەلى جاڭعىرتۋدان وتكەنىنە قاراماستان، كاسىپورىن جۇمىسىندا ءالى دە ىركىلىستەر بارىن سىناعان. سونىڭ سالدارىنان مۇناي ونىمدەرىنىڭ بارلىق ءتۇرى بويىنشا ءوندىرىس كولەمى كەمىگەنىن العا تارتقان.

The Qazaq Times