ەۋروپا پارلامەنتى قىتايدان شىنجاڭداعى بارلىق لاگەردى جابۋدى تالاپ ەتتى

ەۋروپا پارلامەنتى قىتاي ۇكىمەتىنە ەسكەرتۋ جاساپ، قازاق، ۇيعىر جانە تيبەت ۇلتتارىنا باعىتتالعان زاڭسىز تۇتقىنداۋ، قۋدالاۋ ارەكەتتەرىن توقتاتىپ، بارلىق لاگەردى جابۋىن تالاپ ەتتى. بەيجىڭگە باعىتتالعان بۇل ەسكەرتۋ فرانتسيانىڭ سترازبرۋگ قالاسىندا وتكەن ەپ وتىرىسىندا ايتىلدى.

ەپ-نىڭ كەزەكتى وتىرىسى قىتاي ۇكىمەتىنە ەسكەرتۋ جاساۋ شەشىمىن 47 قالىس، 18 قارسى داۋىستان تىس، 505 داۋىستىڭ قولداۋىمەن قابىلدادى. ورتاق قاراردا قازاق، ۇيعىر جانە تيبەت حالقىنىڭ تاعدىرىنا الاڭداۋشىلىق بىلدىرگەن، ەۋروپا پارلامەنتى قىتاي بيلىگىنەن شىنجاڭ جەرىندەگى بارلىق لاگەرلەردى جابۋدى تالاپ ەتكەن.

قىتايدىڭ شىنجاڭ،تيبەت قاتارلى اۆتونوميالى ايماقتارىنداعى از ساندى ۇلتتارعا جاساپ وتىرعان قىسىمى الەمدە بىرقاتار ەلدىڭ قارسىلىعىنا ۇشىراۋدا. بۇعان دەيىن بۇۇ تارابى «ۇيرەنۋ لاگەرلەرى» اتاعان شىنجاڭ جەرىندەگى ساياسي لاگەرلەر تۋرالى تىكەلەي مالىمەت جيناۋ ءۇشىن ايماقتا ەركىن زەرتتەۋ جۇرگىزۋ تالابىن قويعان بولاتىن. الايدا، حالىقارالىق قاۋىمداستىقتىڭ بۇل تالابىن بەيجىڭ بيلىگى قابىلدامادى. تەك، قىتاي ۇكىمەتى جاعىنان بەلگىلەنگەن بىرنەشە لاگەرگە عانا ديپلوماتتاردىڭ كىرۋىنە رۇقسات بەرگەن. ال، اقش كونگرەسى قىتايدىڭ از ساندى ۇلتتارعا جاساعان قىسىمىنا قارسى زاڭ جوباسىن قاراستىرۋ ۇستىندە.

 “The Qazaq Times”