بەلارۋستە مەرزىمىنەن بۇرىن پارلامەنت سايلاۋى وتەتىن بولدى.

ءساۋىر ايىنىڭ 19-ى كۇنى پرەزيدەنت الەكساندر لۋكاشەنكو ۇلتتىق كەڭەس پەن حالىققا جاساعان جولداۋىندا بيىل پارلامەنت سايلاۋى وتەتىنىن مالىمدەدى.

«پرەزيدەنت سايلاۋى زاڭ بويىنشا كونستيتۋتسيادا كورسەتىلگەن ۋاقىتتا وتەدى. ۇگىت-ناستيحات جۇمىستارى بۇرىنعىداي ۇيىمداسقان تۇردە تىنىش ءارى بەيبىت وتەدى. بيىل وكىلدەر پالاتاسى مەن رەسپۋبليكا كەڭەسىنىڭ سايلاۋى بولادى. بۇل سىناق ۇمىتكەرلەرگە عانا ەمەس، جالپى بيلىك تارماعىنا جانە سايلاۋشىلارعا ۇلكەن ەمتيحان» -  دەدى لۋكاشەنكو.

بىراق بەلارۋس پرەزيدەنتى ازىرگە سايلاۋ ۋاقىتى بەلگىلەنبەگەنىن ايتىپ، ءوز ۇسىنىسىن جاسادى.

«7-ءشى قازاندا (قازان توڭكەرىسى كۇنى) وتە تاماشا مەيرەم بار. مەنىڭ ويىمشا، ءدال وسى كۇن ىڭعايلى. سايلاۋ كۇنىن بارلىق يدەولوگيالىق استارلاردى سىرىپ تاستاپ، وسى كۇنگە جاقىن ۋاقىتقا بەلگىلەيىك» - دەدى ول.

زاڭ بويىنشا بەلارۋس پارلامەنتى مەن پرەزيدەنتىنىڭ وكىلەتتىك مەرزىمى 2020 جىلى اياقتالادى. ەل كونستيتۋتسياسىندا ەكى سايلاۋدى قاتار وتكىزۋگە ەشقانداي تىيىم سالىنباعان. بىراق بەلارۋستە قازاقستانداعىداي «ەش ۋاقىتتا، ەش ءبىر سايلاۋ پرەزيدەنت سايلاۋىمەن قاتار ءبىر جىلدا وتپەۋى كەرەك» دەگەن ءداستۇر قالىپتاسقان.

"The Qazaq Times"