نۇر-سۇلتاندا ءسۇريا ماسەلەسى تالقىلانادى

25-26 ساۋىردە نۇر-سۇلتاندا ءسۇريا ماسەلەسى بويىنشا جوعارى دەڭگەيدەگى ون ەكىنشى حالىقارالىق كەزدەسۋ وتەدى. بۇل تۋرالى قر ءسىم حابارلادى.

حابارلامادا ايتىلعانداي، نۇر-سۇلتان فورماتىندا بۇرىن وتكەن سۇرياارالىق كەلىسسوزدەرگە ۇقساس، الداعى كەزدەسۋدە يران، رەسەي مەن تۇركيا، ءسۇريانىڭ ۇكىمەتى مەن قارۋلى وپپوزيتسياسى وكىلدەرى، سونداي-اق بۇۇ مەن يوردانيانىڭ باقىلاۋشىلار دەڭگەيىندەگى دەلەگاتسيالار قاتىسادى. 25 ساۋىردە استانا پروتسەسىنىڭ كەپىلگەر ەلدەرىنىڭ ەكىجاقتى جانە ۇشجاقتى كونسۋلتاتسيالارى، سونداي-اق بايقاۋشى تاراپتارىنىڭ وكىلدەرىمەن كەزدەسۋلەرى، ال جالپى وتىرىس 26 ساۋىردە وتەدى.

نۇر-سۇلتان جينالىسىنىڭ كۇن تارتىبىندە تاراپتار ەڭ اۋەلى ءسۇريادا قاقتىعىسسىز ايماقتار قۇرۋ، سونداي-اق سول ايماقتاردىڭ شەكاراسى مەن كارتاسى جايىنداعى كەلىسىمدى قامتاماسىز ەتۋ، باقىلاۋ مەحانيزمىنىڭ مىندەتتەرىن بەلگىلەيتىن قۇجاتتار مەن كوورديناتسيا ورتالىعى رەگلامەنتىن دايىنداۋ سياقتى ماڭىزدى جۇمىستار جالعاسىن تابادى. سونىمەن قاتار، الدىن الا كۇن تارتىبىنە سايكەس، ءسۇريا بويىنشا كونستيتۋتسيالىق كوميسسيانى قۇرۋ جانە ىسكە قوسۋ بويىنشا جۇمىستى اياقتاۋعا باسا نازار اۋدارا وتىرىپ، ساياسي پروتسەستى ودان ءارى ىلگەرلەتۋ جولدارىن تالقىلاۋ، سونداي-اق نۇر-سۇلتان پروتسەسىنە جاڭا باقىلاۋشى مەملەكەتتەردىڭ قوسىلۋ ماسەلەسى قاراستىرىلادى.

بۇدان بۇرىن ءسۇريا بەيبىتشىلىك كەلىسسوزىنىڭ ءتورتىنشى، بەسىنشى كەزەڭدەرى دە استانادا وتكەن بولاتىن. كەزدەسۋدە قازاقستان ءسۇريا ماسەلەسىنىڭ اسكەري جولمەن شەشىلمەيتىنىن، بۇنى تەك كەلىسىمگە كەلۋ ارقىلى شەشۋگە بولاتىنىن جاريا ەتىپ، الەمدى بىرلىككە شاقىرعان ەدى.

"The Qazaq Times"