بۇگىنگە دەيىن ءتۇپ تامىرى قىتايدان باستالعان COVID-19 ۆيرۋسى 2 ملن 892 مىڭ ادامعا جۇعىپ، 202 مىڭ 500-گە تارتا ادامنىڭ اجالىنا سەبەپكەر بولدى. الەمنىڭ ەكونوميكاسى، تەحنولوگياسى، مەديتسيناسى دامىعان الپاۋىت ەلدەرىنىڭ ءوزىنىڭ شاڭىراعىن شايقالتىپ تۇرعان ۆيرۋس ونسىزدا ىشكى قاقتىعىستار مەن ازاماتتىق سوعىستىڭ زاردابىنان كوز اشپاي تولاسسىز بوسقان بوسقىندارىنا توسقاۋىل قويا الماي وتىرعان تاياۋ شىعىستىڭ ءحالىن تىپتەن اۋىرلاتىپ بارادى.

كوروناۆيرۋستىڭ كەڭىنەن تارقالۋىنا قوسانجارلاپ بار تاعدىرىن قارا التىنعا بايلاعان تاياۋ شىعىس ەلدەرى ءۇشىن سوڭعى كەزدەردەگى مۇناي باعاسىنىڭ شەكتەن تىس قۇلدىراۋى تىپتەن جىعىلعانعا جۇدىرىق بولىپ ءتيىپ جاتىر.

يراك، ليۆان سەكىلدى كەي ەلدەردەگى وتكەن كۇزدەن بەرى ۇدەپ كەتكەن ۇكىمەتكە نارازىلىقتار ەپيدەميا سەبەبىمەن باسەڭدەگەنىمەن ەكونوميكا ءۇشىن ۇلكەن سوققى بولىپ ءتيىپ جاتىر. ايتالىق حالىقارالىق ۆاليۋتا قورىنىڭ مالىمەتىنشە تاياۋ شىعىس، اۋعانستان، پاكىستان، افريكا ەكونوميكاسى 3,1 پايىزعا كەمىگەن. بۇل كورسەتكىش الداعى ۋاقتتا ۇدەي ءتۇسۋى بەك مۇمكىن.

وسى رەتتە گۋمانيتارلىق ۇيىمدار وسى ولكەدە ورنالاسقان بوسقىندار لاگەرىندەگى  ەڭ بەرىسى سۋ تاپشىلىعىنىڭ ءوزى ەپيدەميالىق جاعدايدىڭ اسا اۋىر ەكەنىن حابارلاپ وتىر.

ال رەسمي دەرەكتەردە پاندەميا ءالى تاياۋ شىعىستا تارالماعان.  دەنساۋلىق ساقتاۋ جۇيەلەرىن تۇگەلگە جۋىق كۇيرەتكەن قانشا ۋاقىتتان بەرگى قاندى سوعىس ايماق تۇرعىندارىن اۋرۋحاناعا بارعاننان گورى ۇيىندە جاتىپ كوز جۇمۋىنا ماجبۇرلەيتىنى، ءتىپتى سول ايماقتاردا ەپيدەميالىق تەستىلەۋدىڭ قول جەتىمسىزدىگى رەسمي مالىمەتتىڭ وتىرىك ەكەنىن كورسەتەدى.

كوروناۆيرۋستىڭ العاشقى وشاعى بولعان قىتايمەن جاقىن ارالاسىپ، ەلگە كەلگەندەرگە توسقاۋىل قويماي، ۆيرۋستىڭ العاشقى تارقالۋ كەزەڭدەرىن جاسىرعان. سونىڭ سالدارىنان قىتاي الەمدىك ۆيرۋس وشاعى بولسا، يران پارسى شىعاناعىنىڭ ۆيرۋس وشاعىنا اينالدى. شىعاناقتاعى ەلدەرگە نەگىزىنەن يراننان تارقاي باستادى.

ناۋرىزدىڭ باسىندا كومەندانتتىق ساعات ەنگىزىپ، بازارلار مەن مەكتەپتەردى جاۋىپ، ايماقتار ارالىق ترانسپورتتى توقتاتقان ءسۇريادا ايدىڭ اياعىندا العاشقى ۆيرۋس جۇقتىرعان ادامدى جاريالادى. سوڭعى ون جىلدان بەرگى تولاسسىز سوعىس سالدارىنان سانسىراپ دەنساۋلىق ساقتاۋ جۇيەلەرى تۇگەلگە دەرلىك كۇيرەگەن داماسكتىڭ دە انىق اقپارات بەرمەي، ءيا بولماسا بەرە الماي وتىرعانى انىق.

دۇنيەجۇزىلىك دەنساۋلىق ساقتاۋ ۇيىمى ءسۇريانىڭ سولتۇستىگى پاندەميانىڭ كەلەسى وشاعى بولۋى مۇمكىن دەپ ەسكەرتتى.

ۆيرۋستىڭ تارالۋىنا يراندى جازعىرعان ليۆانداعى شيتتەردىڭ «حەزبوللا» توبى وسى ەپيدەميانى پايدالانىپ ەرىكتىلەردى جانە مەدبيكەلەر مەن دارىگەردى جالداپ كوشپەلى اۋرۋحانا قۇرىپ ەل سەنىمىنە كىرۋگە ءتىرىسىپ جاتقانىدا ايتىلىپ جاتىر. بۇل ەلدىڭ ەكونوميكاسى بيىل 12 پايىزعا قىسقارۋى مۇمكىن دەيدى حالىقارالىق ۆاليۋتا قورى.

مۇناي باعاسىنىڭ قۇلاۋى ليۆان، ءسۇريا، يراك ۇكىمەتتەرىنىڭ كۇنكورىسىنەن ايىرىلعاندارعا تولەيتىن قاراجاتىنىڭ جوقتىعىنان كوروناۆيرۋستان بۇرىن اشارشىلىق قاتتى قىسپاققا الۋى مۇمكىندىگى ايتىلۋدا.

پارسى شىعاناعىنداعى كوپ ەل ەندى عانا شۇعىل شارالار قابىلداپ، حالىقتى جاپپاي تەستلەۋگە كوشىپ جاتىر.

سوڭعىى دەرەك. COVID-19: يراندا - 89 328, كوز جۇمعان 5 650, ساۋد ارابياسىندا - 16299, كوز جۇمعان 136, بىرىككەن اراب امىرلىكتەرىندە - 9813, كوز جۇمعان 71, يراكتا - 1763, كوز جۇمعان 86,  وماندا - 1905, كوز جۇمعان 10, باحرەيندە - 2588, كوز جۇمعان 8, ءسۇريادا - 42 ادام، كوز جۇمعان 3, ليۆاندا 704, كوز جۇمعان 24 ادام دەپ كورسەتىلگەن.

"The Qazaq Times-