جازۋشى ءجادي شاكەنۇلىنىڭ بەس جاڭا كىتابىنىڭ تۇساۋى كەسىلدى

كەشە الماتىداعى قازاقستان جازۋلار وداعى ادەبيەتشىلەر ۇيىندە قازاقستان جانە ەۋرازيا جازۋشىلار وداعىنىڭ مۇشەسى ءجادي شاكەنۇلىنىڭ بەس بىردەي جاڭا كىتابىنىڭ تۇساۋى كەسىلدى. ءجادي شاكەنۇلى بۇعان دەيىن دە «قارالى كوش»، «جانىبەك باتىر»، «ءبىر ۋىس ساۋلە»، «ەل باستاعان ەلىسحان»، تاعى باسقا دا سۇبەلى ەڭبەكتەرىن وقىرمان قاۋىمعا ۇسىنعان.  

كەش تىزگىنىن اقىن باۋىرجان جاقىپ ۇستادى. فوتو: QT,

بۇل رەت ج. شاكەنۇلى «التاي الىپتارى»، «قىتاي قازاقتارىنىڭ ادەبيەتى»، «وسپان باتىر» اتتى زەرتتەۋ ەڭبەكتەرىمەن بىرگە، «بوزمۇنار» اتتى تاۋەلسىزدىك جىلدارىنداعى ءومىر تىنىسىنا ارنالعان رومانىن جانە اۆتوردىڭ ادەبي-تاريحي شىعارمالارى جونىندە جازىلعان زەرتتەۋلەر جيناعى «بەگزات ءسوز» اتتى بەس كىتابىنىڭ تۇساۋىن كەستى.

تۇساۋكەسەردى قازاقستان جازۋشىلار وداعى باسقارماسىنىڭ ورىنباسارى، اقىن باۋىرجان جاقىپۇلى جۇرگىزىپ، «جۇلدىز» جۋرنالىنىڭ باس رەداكتورى، اقىن عالىم جايلىباي، جازۋشى جانات احمادي،  ادەبيەت تانۋشى عالىم تەمىرحان تەبەگەنوۆ، ەتنوگراف عالىم بولات بوپاي، «ەر جانىبەك» حالىقارالىق قورىنىڭ پرەزيدەنتى جەڭىس تۇركيا، وسپان باتىردىڭ نەمەرەسى وركەن ءنابيۇلى قاتارلى قالامگەر عالىمدار مەن قايراتكەرلەر كىتاپتاردىڭ تۇساۋىن كەستى. 

"ەر جانىبەك" حالىقارالىق قورىنىڭ پرەزيدەنتى جەڭىس تۇركيا اۆتورعا ارنايى العىس حات ۇسىندى. فوتو: QT,

شىعارماشىلىق كەشكە دۇنيەجۇزى قازاق قاۋىمداستىعى، قازاقستان جازۋشىلار وداعى، «وتانداستار» قورى ارنايى قۇتتىقتاۋ جولدادى. ادەبيەت تانۋشى عالىم تەمىرحان تەبەگەنوۆ، جازۋشى جانات اقمادي جانە اقىن داۋلەتبەك بايتۇرسىنۇلى ءجادي شاكەنۇلىنىڭ شىعارماشىعى تۋرالى بايانداما جاسادى.

كەشكە قالامگەر جازۋشىلار، وزگە دە زيالى قاۋىم وكىلدەرى قاتىستى. فوتو: QT.

بەس كىتاپتىڭ تۇساۋى كەسىلگەن ادەبي-شىعارماشىلىق كەش انمەن ارلەنىپ، كۇيمەن تەربەلدى. كەشكە جينالعان تاريحشى قالامگەرلەر، عالىمدار زيالى قاۋىم مەن باق وكىلدەرى، وقىرماندار بەس بىردەي جاڭا ەڭبەكتى قازاق رۋحانياتىنا قوسىلعان سۇبەلى تۋىندىلار رەتىندە باعالادى.

“The Qazaq Times”