ءساۋىر ايىندا ءوتۋى ءتيىس بولعان ورتالىق ازيا ەلدەرى باسشىلارىنىڭ ءسامميتى وتپەيتىن بولدى.

وزبەكستان استاناسى تاشكەنت قالاسىندا ءساۋىر ايىنىڭ 12-ءى كۇنى ورتالىق ازيا ەلدەرى باسشىلارىنىڭ كەزەكتى ءسامميتى ءوتۋى ءتيىس بولعان. بىراق تاجىكستان پرەزيدەنت اكىمشىلىگىندەگى دەرەككوزدەردىڭ مالىمەتى بويىنشا، سامميت كەيىنگە قالدىرىلعان. ازىرگە ءسامميتىنىڭ نە سەبەپتى كەيىنگە قالدىرىلعانى بەلگىسىز. بىراق، حالىقارالىق ساراپشىلاردىڭ پىكىرىنشە، ءسامميتتىڭ ءوز ۋاقىتىندا وتپەۋىنە قازاقستانداعى بيلىك ءترانزيتى سەبەپ بولعان جانە بۇل شەشىم مۇددەلى تاراپتاردىڭ كەلىسىمى بويىنشا قابىلدانعان.

ەستەرىڭىزگە سالايىق، ورتالىق ازيا ەلدەرى باسشىلارىنىڭ العاشقى باس قوسۋى بىلتىر ناۋرىز ايىنىڭ 15-ءى كۇنى استانا قالاسىندا وتكەن. وعان سول كەزدەگى قازاقستان پرەزيدەنتى نۇرسۇلتان نازارباەۆ، وزبەكستان باسشىسى شاۆكات ميرزيەەۆ، قىرعىزستان پرەزيدەنتى سوورونباي جەەنبەكوۆ، تاجىكستان باسشىسى ەمومالي راحمون جانە تۇركىمەنستان پارلامەنت ءماجىلىسىنىڭ ءتورايىمى اقجا نۇربەردىەۆا قاتىسقان.

"The Qazaq Times"