ەمما ستوۋن: "مەن ارمانىمنىڭ جەتەگىندە جۇرگەن جانمىن"

2017 جىلدىڭ ەڭ تانىمال فيلمدەرىنىڭ ءبىرى «لا-لا لەند» — دەميەن شازەلل تۇسىرگەن امەريكالىق تراگيكومەديا جانرىنداعى ميۋزيكل. فيلمدە  لوس-اندجەلەستەگى ارمانشىل جاس اكتريساعا عاشىق بولعان دجاز پيانوشى تۋرالى باياندالادى. لەنتانىڭ الەمدىك پرەمەراسى 2016 جىلدىڭ 31 تامىز كۇنى ۆەنەتسيان حالىقارالىق فەستيۆالىندە وتكىزىلىپ، سول فەستيۆالدىڭ اشىلۋ سالتاناتىندا كورسەتىلگەن فيلم  بولاتىن.

بۇل كارتينا «وسكارعا» 13 نوميناتسيا بويىنشا ۇسىنىلىپ، ونىڭ 6-نان جەڭىسكە جەتتى. ايتا كەتسەك، بۇل جىلى ەڭ كوپ نوميناتسيامەن قاتىسقان ۇزدىك تۋىندى. ونىڭ ىشىندە بارلىق سىنشىلاردىڭ وڭ باعاسىن الىپ، جەڭىمپاز اتانادى دەپ كۇتىلگەن ميا ءرولىن سومداعان ەمما ستوۋن بولاتىن. كوپشىلىكتىڭ بولجامى ورىندالىپ اكادەميا «ەڭ ۇزدىك ايەل ءرولى» اتاعىن ەمما ستوۋنعا بەرۋدى ءجون كوردى. اكتريسانىڭ تابىنۋشىلارىنىڭ قۋانىشىندا شەك جوق، سونىمەن قاتار ونىڭ وسى اتاقتى جەڭىپ الاتىنىنا ەشكىم دە كۇمان كەلتىرمەگەن ەدى.

اكتريسا RED BULLETIN باسىلىمىنا بەرگەن سۇحباتىندا: «ەڭ قىزىعى، لوس-اندجەلەسكە كەلگەن ادامداردىڭ كوپشىلىگىندە ءبىر عانا ماقسات بولادى، ارينە، جۇلدىز بولۋ. ءجۇز مىڭداعان ادامداردىڭ بارلىعى بىردەي ارمانىن ىسكە اسىرمايدى، ىسكە اسىرعاننىڭ وزىندە ويلاعانىنداي دارەجەدە بولا بەرمەيدى. بۇل رۋحاني اپات. ارينە، مەن ەشكىمگە ءوز ارمانىڭنىڭ سوڭىنان ەرمە دەپ ايتپاس ەدىم. مەن ءوزىم ارمانىمنىڭ جەتەگىنە ەرگەن جانمىن! جايمەنەن ورىندالا باستاعان عاجايىپ ءساتتى جەتكىزىپ ايتۋدىڭ ءوزى قيىن. بىراق بارىنە ورتاق بىردەي رەتسەپت بولمايدى. مەندە ءبارىن تاستاعىم كەلگەن ساتتەر دە بولدى، بىراق جولىم بولدى. "سۋپەرجاماننان" ("Superbad") كەيىن 18  جاسقا تولماي جاتىپ ءومىرىم وزگەردى. تاعدىردىڭ جازۋى سولاي شىعار» - دەپ، جەڭىسكە جەتۋدەگى قۇپياسىمەن ءبولىستى.