ءمامين: پرەزيدەنت باستامالارىنىڭ بارلىعى ورىندالاتىن بولادى

«پرەزيدەنت باستامالارىنىڭ بارلىعى ورىندالاتىن بولادى» - دەپ مالىمدەدى پرەمەر-مينيستر اسقار ءمامين.

بۇگىن استانا قالاسىندا وتكەن ۇكىمەت وتىرىسىندا اسقار ءمامين پرەزيدەنتتىڭ حالىقتىڭ ءال-اۋقاتىن ارتتىرۋعا باعىتتالعان «الەۋمەتتىك قامقورلىق» باعدارلاماسىنا قاتىستى مالىمدەمە جاسادى.

« مەملەكەت باسشىسىنىڭ بارلىق باستامالارى قارجىمەن قامتىلعان جانە تولىقتاي جۇزەگە اسىرىلاتىن بولادى» - دەدى ءمامين.

بۇدان بولەك ۇكىمەت وتىرىسىندا الەۋمەتتىك-ەكونوميكالىق دامۋ جانە قاڭتار-اقپان ايلارىنداعى بيۋدجەت قارجىسىن يگەرۋگە قورىتىندى جاسالدى.

«ءبىزدىڭ الدىمىزعا قويىلعان باستى ماقسات – ەكونوميكانىڭ تۇراقتى ءوسىمى. ءبىز جالپى ىشكى ءونىمنىڭ 5 پايىزعا ءوسۋىن قامتاماسىز ەتۋىمىز كەرەك. ول ءۇشىن بارلىعىمىز جۇمىلا جۇمىس ىستەۋىمىز قاجەت» - دەپ مالىمدەدى پرەمەر مينيستر.

ەستەرىڭىزگە سالايىق، اسقار ءمامين ۇكىمەتىنىڭ جاساقتالعانىنا ءبىر ايعا جۋىق ۋاقىت بولدى. بۇعان دەينگى باقىتجان ساعىنتاەۆ كابينەتىن پرەزيدەنت نازارباەۆ وتستاۆكاعا جىبەرگەن. ول ءوزىنىڭ بۇل شەشىمىن « ساعىنتاەۆ ۇكىمەتىنىڭ وزىنە جۇكتەلگەن مىندەتتەرىن دۇرىس اتقارماۋىمەن» تۇسىندىرگەن.

جالپى، ءمامين پرەمەر-مينيستر بولىپ تاعايىندالعان ۋاقىتتا ساراپشىلاردىڭ باسىم كوپشىلىگى وعان «پرەزيدەنت باستامالارىن جۇزەگە اسىراتىن كەزەكتى ورىنداۋشى» دەگەن باعا بەرگەن.

"The Qazaq Times"