27 قاڭتاردا سەنات بۇرىنعى پرەزيدەنت نۇرسۇلتان نازارباەۆتىڭ وكىلەتىن قىسقارتۋدى ماقۇلدادى. بۇل تۋرالى ورتالىق ازيا جاڭالىقتار قىزمەتى جازدى.

بەيسەنبى كۇنى سەنات وسى تۇزەتۋدى قولداپ، وعان قوسا زاڭ جوباسىنا تاعى ءبىر تۇزەتۋ ۇسىندى. "زاڭدى تالقىلاۋ بارىسىندا تاعى ءبىر نورما ەنگىزىلىپ وتىر.

ول – "تۇڭعىش پرەزيدەنت تۋرالى" زاڭنان مەملەكەتتىڭ ىشكى جانە سىرتقى ساياساتىنا بايلانىستى باستامالاردى ەلباسىمەن كەلىسىلۋگە ءتيىس دەگەن نورما الىپ تاستالىپ وتىر. سوندىقتان دا سەنات زاڭناماعا ەنگىزىلگەن وزگەرىستەردى تۇجىرىمدامالى تۇردە قولداپ، ءبىر وزگەرىسپەنەن ماجىلىسكە قايتارىپ وتىر" دەدى سەنات دەپۋتاتى ءلاززات سۇلەيمەن.

5 قاڭتاردا قازاقستاندا جاپپاي نارازىلىق ورشىگەن تۇستا پرەزيدەنت قاسىم-جومارت توقاەۆ قاۋىپسىزدىك كەڭەسىنىڭ توراعالىعىن قولعا الاتىنىن مالىمدەگەن. سول كەزدە نازارباەۆقا جاقىن دەلىنگەن بىرقاتار جوعارى لاۋازىمدى تۇلعالار قىزمەتتەن الىنعان. بۇدان سوڭ اقپارات قۇرالدارى مەن الەۋمەتتىك جەلىلەردە نازارباەۆ پەن توقاەۆ اراسىندا بيلىككە تالاستىڭ ورشىگەنى جونىندە بولجامدار ايتىلا باستاعان.

الايدا بۇرىنعى پرەزيدەنتتىڭ ءباسپاسوز حاتشىسى ايدوس ۇكىباي "قاۋىپسىزدىك كەڭەسى توراعالىعىن تاپسىرۋ تۋرالى شەشىمدى نازارباەۆتىڭ ءوزى قابىلداعانىن" ايتىپ، سەندىرۋگە تىرىسقان. قازاقستاندى وتىز جىلداي باسقارعان نازارباەۆ 2019 جىلى ناۋرىزدا پرەزيدەنتتىكتەن كەتكەن ەدى. بىراق ول 2022 جىلدىڭ 5 قاڭتارىنا دەيىن قاۋىپسىزدىك كەڭەسىنىڭ ومىرلىك باسشىسى رەتىندە بيلىككە ىقپال ەتىپ وتىرعان. كەيبىر ساراپشىلار قاڭتاردا ەلدە بولعان نارازىلىق پەن تارتىپسىزدىك نازارباەۆتىڭ ىقپالىن السىرەتتى دەپ سانايدى.

بۇعان دەيىن ءماجىلىس نازارباەۆتىڭ قاۋىپسىزدىك كەڭەسى جانە قازاقستان حالقى اسسامبلەياسىن ءومىر بويى باسقارۋ قۇقىعىنان ايىراتىن وزگەرىستى ماقۇلداعان ەدى.

قازىر نازارباەۆتىڭ قولىندا "ەلباسى" ستاتۋسى عانا قالدى. زاڭ بويىنشا، بۇل ستاتۋس ونى جانە ونىڭ وتباسىن قىلمىستىق قۋدالاۋدان قورعايدى. 19 قاڭتاردا قازاقستاندا نازارباەۆتى تيىسپەۋشىلىك مارتەبەسىنەن ايىرۋدى كوزدەيتىن پەتيتسياعا قول جيناۋ باستالعان.