«وسكار» جۇلدەسىنە ۇمىتكەر ءسۇريا ازاماتىن اقش–قا كىرگىزبەي جاتىر

سۇرياداعى (سيريا) «اق دۋلىعا» اتتى ۇكىمەتتىك ەمەس گۋمانيتارلىق ۇيىم جايلى تۇسىرىلگەن ءفيلمنىڭ وپەراتورى،  «وسكار» جۇلەسىنە ۇمىتكەر ءسۇريا ازاماتى حالەد ءحاتيبتىڭ اقش-قا كەلەر تۇستا بەلگىسىز سەبەپتەرمەن ەلگە كىرۋىنە تىيىم سالعان  دەپ حابارلايدى اسسوشيەيتەد پرەسس.

Netflix كومپانياسىنىڭ «اق دۋلىعا» ءفيلمى «ەڭ ۇزدىك قىسقامەتراجدى دەرەكتى فيلم» نوميناتسياسى بويىنشا «وسكار» جۇلدەسىنە ۇسىنىلعان بولاتىن.  40 مينۋتتىق دەرەكتى فيلم تۇركيادان سۇرياعا اتتانعان سوعىس وشاعىنداعى تۇرعىنداردى قۇتقارۋشى توپ جايلى تۇسىرىلگەن.

وسىعان دەيىن 21 جاسار سۇريالىق وپەراتورعا امەريكالىق ۆيزا بەرىلگەن، بىراق  Turkish Airlines اۋە كومپانياسى ستامبۇلدان لوس-اندجەلەسكە اتتاناتىن ۇشاققا وتىرعىزۋدان باس تارتقان. اگەنتتىكتەردىڭ اقپاراتىنا سايكەس،  اقش-تىڭ ىشكى قاۋىپسىزدىك دەپارتامەنتى حاتيب جايلى تۇسكەن «جاعىمسىز مالىمەتكە» سۇيەنە وتىرىپ، ەلگە كىرۋىنە سوڭعى ساتتە رۇقسات بەرمەگەن.

بۇل تۇسىنىسپەۋشىلىكتەر قاراپايىم ۆيزالىق رەجيمنىڭ بۇزىلۋىنان باستاپ تەرروريستەرمەن بايلانىس جونىندەگى اقپاراتتاردان دا بولۋى مۇمكىن دەگەن بولجام كەلتىرەدى.

ال ىشكى قاۋىپسىزدىك دەپارتامەنتىنىڭ وكىلى دجيلليان كريستينسەن: «قۇراما شتاتتارعا كىرۋ ءۇشىن ارنايى جول ءجۇرۋ قۇجاتتارى قاجەت» - دەپ، مالىمدەۋدە.

كەلەڭسىز وقيعا اقش پرەزيدەنتى دونالد ترامپتىڭ بىرنەشە مۇسىلمان ەلدەرىنە امەريكاعا  كىرۋگە رۇقسات بەرىلمەيتىندىگى جايلى بۇيرىققا قول قويۋى سالدارىنان بولىپ وتىر. بىراق سيەتل سوتىنىڭ ۇكىمىمەن بۇيرىقتىڭ جۇزەگە اسۋ ۋاقىتى شەگەرىلگەن. ال ترامپ جەتى مۇسىلمان ەلدەرى ازاماتتارىنىڭ اقش-قا كىرۋىنە تىيىم سالاتىن جاڭا بۇيرىققا قول قوياتىنىن ەسكەرتتى. ال اتالعان جەتى مەملەكەتتىڭ قاتارىنا: يران، يراك، ءسۇريا، يەمەن، ليۆيا، سومالي جانە سۋدان مەملەكەتتەرى كىرگەن.

«The Qazaq Times»