رەسەيدە عالامتور تسەنزۋراسىنا قارسى شەرۋ ءوتتى

ماسكەۋدە دەربەس ينتەرنەت تۋرالى زاڭ جوباسىنا قارسى نارازىلىق شەرۋى ءوتتى. بۇل تۋرالى BBC حابارلادى.

اۆتونومدى رۋنەت تۋرالى قۇجاتقا سايكەس، عالامتوردىڭ رەسەيلىك سەگمەنتى وقشاۋلانىپ، حالىقارالىق قىزمەتتەر بۇعاتتالادى. سونگمەن قاتار، قولدانۋشىنىڭ اقپاراتى قاداعالانادى. نارازىلىق اكتسياسىنا قاتىسقان 15 مىڭنان استام ادام اتالعان قۇجاتتىڭ جويىلۋىن تالاپ ەتتى. شەرۋگە قاتىسۋشىلار: «قىتايدى مىسالعا الار بولساق، ينتەرنەت جىلدامدىعىتومەن ءارى قىمبات. سونداي-اق سايتتار، اقپارات اگەنتتىكتەرى، الەۋمەتتىك جەلىلەر دۇرىس جۇمىس ىستەمەيدى. ال رەسەيدە عالامتور قولجەتىمدى بولۋى قاجەت. ينتەرنەت – زاماناۋي ورتاق قۇندىلىق جانە ءسوز بوستاندىعىنىڭ كەپىلى. ول – ءبىزدىڭ كونستيتۋتسيالىق قۇقىعىمىز. سوندىقتان قوعام ەركىن ينتەرنەتتى قورعاۋ ءۇشىن كۇش بىرىكتىرۋى ءتيىس»،– دەيدى. شارا كەزىندە ءتارتىپ ساقشىلارى درون ۇشىرعان ونعا جۋىق ادامدى جانە بىرنەشە تۇرعىندى قاماۋعا الدى.

رەسەي مەملەكەتتىك دۋماسى «دەربەس ينتەرنەت تۋرالى» زاڭ جوباسىن ءبىرىنشى وقىلىمدا قابىلداعان بولاتىن. رەسەي پارلامەنتىنىڭ اقپاراتتىق ساياسات جانە كوممۋنيكاتسيالار كوميتەتىنىڭ باسشىسى لەونيد لەۆين: «مەملەكەت ەشقانداي تسەنزۋرا ورناتىپ، جاڭا شەكتەۋلەر ەنگىزىپ وتىرعان جوق. بار بولعانى، وسىعان دەيىن مەملەكەتتىك دەڭگەيدە تىيىم سالىنعان سايتتاردى VPN-ءنىڭ كومەگىمەن قاراپ كەلگەن ازاماتتاردى قاتاڭ باقىلاۋعا العالى وتىر»، – دەپ مالىمدەدى.

رەسەي مۇنداي شەكتەۋ قويىپ وتىرعان العاشقى مەملەكەت ەمەس. الەمدەگى قولدانۋشىسى كوپ الەۋمەتتىك جەلىلەردى قولدانۋعا رۇقسات ەتىلمەگەن قىتايدا VPN-دەردىڭ جۇمىسىن توقتاتۋ «عالامتوردى تازالاۋ جانە ستاندارتتاۋ» دەپ اتالاتىن بىرىڭعاي مەملەكەتتىك ساياسات اياسىندا جۇزەگە اسادى.

"The Qazaq Times"