رەسەي ۇكىمەتى وتستاۆكاعا كەتتى

ءپۋتيننىڭ فەدەرالدىق جيىنعا جاساعان ۇندەۋىنەن كەيىن رەسەي ۇكىمەتى تولىق قۇراممەن وتستاۆكاعا كەتتءى.

ءوز جولداۋىندا رەسەي پرەزيدەنتى كونستيتۋتسياعا وزگەرىستەر ەنگىزىپ، ءتيىستى رەفەرەندۋم وتكىزۋدى ۇسىنعان. پرەمەر-مينيستر دميتري مەدۆەدەۆتىڭ ايتۋىنشا، ۇكىمەت پرەزيدەنتكە بۇل باعىتتا بارلىق قاجەتتى شەشىمدەر قابىلداۋ ءۇشىن مۇمكىندىك بەرۋى ءتيىس. سول سەبەپتى دە وتستاۆكاعا كەتۋدى ۇيعارعان.

ۇكىمەت وتستاۆكاسىن پرەزيدەنت قابىلدادى. ەندى جاڭا مينيسترلەر كابينەتى قۇرىلعانشا، 2018 جىلدىڭ مامىرىندا قۇرىلعان ۇكىمەت ءوز مىندەتىن اتقارا بەرەدى. ال ۆلاديمير پۋتين دميتري مەدۆەدەۆكە قاۋىپسىزدىك كەڭەسى باسشىسىنىڭ ورىنباسارى قىزمەتىن اتقارۋدى ۇسىنىپ وتىر. بىراق ازىرگە مۇنداي لاۋازىم جوق.

ايتا كەتەيىك، مەدۆەدەۆ رەسەي ۇكىمەتىن 2012 جىلدان بەرى باسقارىپ كەلەدى. 2008-2012 جىلدارى رەسەي پرەزيدەنتى بولعان. ول 2012 جىلدان بەرى «ەدينايا روسسيا» پارتياسىن دا باسقارادى.

"The Qazaq Times"