گۇلنارا كارىموۆا كولونياعا اۋىستىرىلدى

وزبەكستاننىڭ تۇڭعىش پرەزيدەنتى يسلام كارىموۆتىڭ ۇلكەن قىزى گۇلنارا كارىموۆا جازاسىن وتەۋ شارتتارىن بۇزعانى ءۇشىن جالپى رەجيمدەگى كولونياعا اۋىستىرىلدى، دەپ حابارلادى وزبەكستان باس پروكۋراتۋراسى.

ۆەدومستۆونىڭ مالىمەتىنشە، مۇنداي شەشىم وتكەن جىلى شىلدەدە بوپسالاۋشىلىق پەن سالىقتان جالتارۋ ءىسى بويىنشا باس بوستاندىعىن شەكتەۋگە اۋىستىرىلعان كارىموۆانىڭ جازانى وتەۋ ءتارتىبى مەن شارتتارىن قاساقانا بۇزۋىنا بايلانىستى قابىلدانعان. پروكۋراتۋرا حابارلاماسىندا ايتىلعانداي، سوتتالۋشى «سوت بەلگىلەگەن مىندەتتەمەلەردى جۇيەلى تۇردە بۇزعان»،  اتاپ ايتقاندا، 2018 جىلدىڭ قاراشاسىندا تۇرعىلىقتى جەرىنەن كەتىپ، ەسكەرتۋگە ىلىككەن. حابارلامادا: «جازانى الدىن الۋدىڭ ورنىنا، گ.كارىموۆا جازانى وتەۋ ءتارتىبى مەن شارتتارىن قاساقانا بۇزۋدى جالعاستىردى. ونىڭ قاتارىندا: ينتەرنەت ارقىلى بايلانىس قۇرالدارىن بىرنەشە رەت پايدالاندى; قىلمىستىق ءىس بويىنشا بەلگىلەنگەن زالالدى وتەگەن جوق»، – دەلىنگەن.

سەيسەنبىدە گۇلنارا كارىموۆانىڭ قىزى يمان ونىڭ اناسىن باس پروكۋراتۋرا قىزمەتكەرلەرى كولونيادان بوساتىلعاننان كەيىن تاشكەنتتەگى پاتەرىنەن الىپ كەتكەنىن حابارلادى. ول ءوزىنىڭ Instagram پاراقشاسىندا: «ساعات 19:00 شاماسىندا وزبەك پروكۋراتۋراسىنىڭ قىزمەتكەرلەرى تاشكەنتتەگى پاتەرىمە باسا-كوكتەپ كىرىپ كەلدى. مەرزىمىنەن بۇرىن شارتتى تۇردە بوستاندىققا شىققان انام وسى پاتەردە 2018 جىلدىڭ ماۋسىم ايىنىڭ سوڭىنان بەرى تۇرادى. بىرنەشە مينۋتتان سوڭ پروكۋراتۋرانىڭ وزگە قىزمەتكەرلەرىمەن بىرگە جەتىپ كەلىپ، انامدى بەلگىسىز جاققا الىپ كەتتى»، – دەپ جازدى. ال اقپاندا كارىموۆانىڭ ۇلى يسلام Instagram جەلىسىندە تەرگەۋشىلەر جازاسىن وتەپ جاتقان اناسىنا قىسىم كورسەتىپ، ۋاقىتىلى مەديتسينالىق كومەك كورسەتپەگەنىن جازعان بولاتىن.

كارىموۆا 2013 جىلعا دەيىن كوپشىلىك الدىندا ءجۇردى، ەلدىڭ ساياسي ومىرىنە ارالاستى. سونىمەن قاتار، ول وزبەكستاندى 27 جىل باسقارىپ، 2016 جىلى قىركۇيەكتە قايتىس بولعان اكەسى يسلام كارىموۆتىڭ ورنىن باسۋى ىقتيمال تۇلعا رەتىندە تانىلعان.

گۇلنارا كارىموۆانىڭ ۇستىنەن قىلمىستىق ءىس 2015 جىلى قوزعالدى. ءدال وسى جىلى تاشكەنت قالالىق سوتى ونى «اسا ءىرى كولەمدە قارجى جىمقىرۋ»، «بوپسالاۋ»، «سالىقتان جالتارۋ» ايىپتارى بويىنشا كىنالى دەپ تانىپ، بەس جىلعا باس بوستاندىعىنان ايىرعان. 2017 جىلى شىلدەدە وزبەكستان باس پروكۋراتۋراسى گۇلنارا كارموۆانىڭ ۇستىنەن تاعى بىرنەشە قىلمىس بويىنشا ءىس قوزعالعاندىعىن مالىمدەدى. وزبەكستان رەسمي ورگاندارىنىڭ مالىمدەمەسىنەن كەيىن ونعان تيەسىلى الەمنىڭ 12 ەلىندەگى بانك شوتتارى مەن جىلجىمايتىن مۇلىكتەرى بۇعاتتالعان. كارىموۆاعا قارسى ەكى قىلمىستىق ءىس بويىنشا مەملەكەتكە كەلتىرىلگەن زالالدىڭ جالپى سوماسى 2 ملرد دوللار.

"The Qazaq Times"