Foto: http://pics.utro.ru

Özbekstannıñ twñğış prezidenti Islam Kärimovtıñ ülken qızı Gülnara Kärimova jazasın öteu şarttarın bwzğanı üşin jalpı rejimdegi koloniyağa auıstırıldı, dep habarladı Özbekstan Bas prokuraturası.

Vedomstvonıñ mälimetinşe, mwnday şeşim ötken jılı şildede bopsalauşılıq pen salıqtan jaltaru isi boyınşa bas bostandığın şekteuge auıstırılğan Kärimovanıñ jazanı öteu tärtibi men şarttarın qasaqana bwzuına baylanıstı qabıldanğan. Prokuratura habarlamasında aytılğanday, sottaluşı «sot belgilegen mindettemelerdi jüyeli türde bwzğan»,  atap aytqanda, 2018 jıldıñ qaraşasında twrğılıqtı jerinen ketip, eskertuge ilikken. Habarlamada: «Jazanı aldın aludıñ ornına, G.Kärimova jazanı öteu tärtibi men şarttarın qasaqana bwzudı jalğastırdı. Onıñ qatarında: internet arqılı baylanıs qwraldarın birneşe ret paydalandı; qılmıstıq is boyınşa belgilengen zalaldı ötegen joq», – delingen.

Seysenbide Gülnara Kärimovanıñ qızı Iman onıñ anasın Bas prokuratura qızmetkerleri koloniyadan bosatılğannan keyin Taşkenttegi päterinen alıp ketkenin habarladı. Ol öziniñ Instagram paraqşasında: «Sağat 19:00 şamasında özbek prokuraturasınıñ qızmetkerleri Taşkenttegi päterime basa-köktep kirip keldi. Merziminen bwrın şarttı türde bostandıqqa şıqqan anam osı päterde 2018 jıldıñ mausım ayınıñ soñınan beri twradı. Birneşe minuttan soñ prokuraturanıñ özge qızmetkerlerimen birge jetip kelip, anamdı belgisiz jaqqa alıp ketti», – dep jazdı. Al aqpanda Kärimovanıñ wlı Islam Instagram jelisinde tergeuşiler jazasın ötep jatqan anasına qısım körsetip, uaqıtılı medicinalıq kömek körsetpegenin jazğan bolatın.

Kärimova 2013 jılğa deyin köpşilik aldında jürdi, eldiñ sayasi ömirine aralastı. Sonımen qatar, ol Özbekstandı 27 jıl basqarıp, 2016 jılı qırküyekte qaytıs bolğan äkesi Islam Kärimovtiñ ornın basuı ıqtimal twlğa retinde tanılğan.

Gülnara Kärimovanıñ üstinen qılmıstıq is 2015 jılı qozğaldı. Däl osı jılı Taşkent qalalıq sotı onı «asa iri kölemde qarjı jımqıru», «bopsalau», «salıqtan jaltaru» ayıptarı boyınşa kinäli dep tanıp, bes jılğa bas bostandığınan ayırğan. 2017 jılı şildede Özbekstan Bas prokuraturası Gülnara Kärmovanıñ üstinen tağı birneşe qılmıs boyınşa is qozğalğandığın mälimdedi. Özbekstan resmi organdarınıñ mälimdemesinen keyin onğan tiesili älemniñ 12 elindegi bank şottarı men jıljımaytın mülikteri bwğattalğan. Kärimovağa qarsı eki qılmıstıq is boyınşa memleketke keltirilgen zalaldıñ jalpı soması 2 mlrd dollar.

"The Qazaq Times"