وزبەكستان ەكس-حانشايىمى گۇلنارا كارىموۆانىڭ ۇستىنەن تىعى ءبىر قىلمىستىق ءىس قوزعالدى.

وزبەكستان باس پروكۋراتۋراسى تاراتقان مالىمەت بويىنشا، گۇلنارا كارىموۆا مەملەكەتتىڭ يەلىگىندەگى ەكى تسەمەنت زاۋىتىن ارزان باعاعا ساتىپ الىپ، كەيىننەن ونى شەتەلدىك كومپانيالارعا ساتقان دەگەن كۇدىككە ىلىنگەن. ايىپتاۋشى تاراپتىڭ مالىمەتىنشە، «ەكس-حانشايىم» ساتىپ الۋشىلاردىڭ زاڭسىز ارەكەتتەرىن جاسىرىپ، ولاردى قورعاشتاۋ ارقىلى مەملەكەتكە اسا ءىرى كولەمدە زيان الىپ كەلگەن. بۇدان بولەك كارىموۆاعا «وزگەنىڭ مۇلكىن كۇشپەن يەمدەنۋ» بابى بويىنشا دا ايىپ تاعىلعان.

«گۇلنارا كارىموۆا وزگە ازاماتتار مەن كومپانيالارعا تيەسىلى مۇلىكتەردى كۇش كورسەتەمىن دەپ قورقىتىپ، وزىنە تيەسىلى كومپانيالاردىڭ يەلىگىنە وتكىزۋگە ماجبۇرلەدى» - دەلىنگەن باس پروكۋراتۋرا تاراتقان مالىمدەمەدە.

2015 جىلى تاشكەنت سوتى كارىموۆانى مەملەكەت قارجىسىن تالان-تاراجعا سالدى جانە سالىق تولەۋدەن جالتاردى دەگەن ايىپپەن بەس جىلعا سوتتاعان. كەيىننەن كارىموۆانىڭ ۇستىنەن جەمقورلىق، اسا ءىرى كولەمدە پارا الۋ، ۇيىمداسقان قىلمىستىق توپ قۇرۋ باپتارى بويىنشا قىلمىستىق ءىس قوزعالىپ، 2017 جىلى 10 جىلعا باس بوستاندىعىنان ايىرىلعان. اكەسى يسلام كارىموۆتىڭ كوزى ءتىرى كەزىندە گۇلنارا كارىموۆا وزبەكستانداعى بەدەلدى ساياساتكەرلەردىڭ ءبىرى بولعان. ونىڭ ساياسي بولاشاعىنا كوپشىلىك «اكەسىنىڭ ورنىن باساتىن مۇراگەر» دەگەن باعا بەرگەن.

"The Qazaq Times"