اۆستريا «كوكبورى» بەلگىسىنە تىيىم سالدى

اۆستريا پارلامەنتى 2018 جىلدىڭ جەلتوقسان ايىندا قابىلداعان «سيمۆول زاڭى» 1 ناۋرىزدان باستاپ اتقارىلا باستاعان. اتالعان زاڭ اياسىندا تۇرىك ۇلتشىلدارىنىڭ «كوكبورى» بەلگىسى دە اۆستريا جەرىندە شەكتەلگەن بولاتىن. الايدا، بۇعان قارسى نارازىلىقتار باسىلار ەمەس.

اۆستريا پارلامەنت قابىلداعان «سيمۆول زاڭى» اياسىندا ەلدە دايش، ءال-كايدا، PKK, حاماس، مۇسىلمان باۋىرلارى، حيزبۋللا قاتارلى تەررورلىق ۇيىمداردىڭ بەلگىلەرىن قامتىعان 13 سيمۆولعا شەكتەۋ قويعان. ناسيحاتتاۋ مەن تاراتۋعا، ادامدار اراسىنداعى قارىم-قاتىناستا ماقساتتى پايدالانۋعا تىيىم سالعان بولاتىن.

الايدا، بۇل تىيىم سالىنعان بەلگىلەر اراسىندا تۇرىك ۇلتشىلدارىنىڭ «كوكبورى» بەلگىسىنىڭ بولۋى سول ەلدەگى جانە تۇركيا مەن ەۋروپا ەلدەرىندەگى تۇرىكتەردىڭ نارازىلىعىن قوزعادى. ولار پرەمەر-مينيستر كۋرتستىڭ الەۋمەتتىك جەلىدەگى پاراقشاسىنا نارازىلىق پىكىرلەرىمەن بىرگە «كوكبورى» بەلگىسىن قالدىرعان.

بۇل نارازىلىقتارعا قارسى اۆستريا پرەمەرى رەسمي مالىمدەمە جاساۋىنا تۋرا كەلدى. ول سوزىندە: «ءبىزدىڭ دەموكراتيالىق قۇندىلىقتارىمىزدى قابىلداي المايتىندارعا، وعان قارسى كۇرەسەتىندەرگە بۇل ەلدە ورىن جوق. زاڭعا باعىنبايتىندار قۇقىقتىق جازاعا تارتىلادى»، – دەگەن.

“The Qazaq Times”