قازاقستاندىقتار جاڭا ۇكىمەتتەن جاعىمدى وزگەرىستەر كۇتپەيدى

«DEMOSCOPE قوعامدىق پىكىرگە جەدەل-مونيتورينگ جۇرگىزۋ بيۋروسى» قازاقستان ازاماتتارى اراسىندا «ۇكىمەتىنىڭ وتستاۆكاعا كەتۋى» تاقىرىبىندا ساۋالناما جۇرگىزگەن. اقپان ايىنىڭ 26-ى مەن 27-ءى كۇندەرى ارالىعىندا جۇرگىزىلگەن ساۋالناماعا الماتى، استانا، شىمكەنت قالالارى جانە 14 وبلىس ورتالىعىنىڭ تۇرعىندارى اراسىنان  18 جاستان اسقان 1868 ازامات قاتىسقان.

«Demoscope» بيۋروسى ۇكىمەتتىڭ كۇتپەگەن جەردەن وتستاۆكاعا كەتۋى جايلى قازاقستاندىقتاردىڭ ويىن بىلگەن، سونىمەن قاتار حالىقتىڭ ەسىندە قالعان ەڭ ۇزدىك جانە ەڭ ناشار مينيسترلەردىڭ كىم بولعانىن دا انىقتاعان.  ساۋالناماعا قاتىسقان ازاماتتاردىڭ كوبى ۇكىمەتتىڭ اۋىسقانىنان اۋقىمدى وزگەرىستەر كۇتپەيتىندىكتەرىن ايتقان.

ساۋالناما بارىسىندا قاتىسۋشىلار ەل ەسىندە ءوزىنىڭ ادال ەڭبەگىمەن قالعانداردىڭ توپ-ۇشتىگىنە يمانعالي تاسماعامبەتوۆ، باقىتجان ساعىنتاەۆ جانە كارىم ءماسىموۆ كىرگىزگەن. ال مينيستر قىزمەتىنە «لايىقسىزدار» انتيرەيتينگىنە سوڭعى كەزدەرى ەسىمدەرى ەل اۋىزىنان تۇسپەيتىن مادينا ابىلقاسىموۆا، ەرلان ساعاديەۆ جانە قانات بوزىمباەۆتى ەنگىزگەن.

رەسپوندەنتتەردىڭ 73%-ى ۇكىمەت مۇشەلەرىنىڭ ەشقايسىنىڭ اتىن ەسىنە تۇسىرە الماعان. نەبارى 633 ادام عانا بۇل سۇراققا ناقتى جاۋاپ بەرگەن.

جۇرگىزىلگەن ساۋالناما قورىتىندىسىنا سايكەس، ازاماتتاردىڭ 66%-ى جاڭادان جاساقتالعان ۇكىمەتتەن جاعىمدى وزگەرىستەر كۇتپەيتىندىكتەرىن ايتقان. مينيسترلەر كابينەتىنىڭ ساياسي ىقپالىن «تومەن» دەپ باعالاعان.

قىزىلوردا، جامبىل جانە باتىس قازاقستان وبلىستارى تۇرعىندارىنىڭ جاڭا ۇكىمەتتەن كۇتەر ۇمىتتەرى ۇلكەن (44%). پاۆلودار جانە قاراعاندى وبلىسىنان قاتىسقان رەسپوندەنتتەر (49,5%) جاڭا كوماندانىڭ ناتيجەلى جۇمىس جاسايتىنىنا كۇمانمەن قارايدى.

قاتىسۋشىلاردىڭ جارتىسى پرەزيدەنتتىڭ ۇكىمەتتى وتستاۆكاعا جىبەرۋىن حالىقتىڭ نارازىلىعىنىڭ ارتۋىمەن، ءومىر ءسۇرۋ دەڭگەيىنىڭ تومەندەۋىمەن بايلانىستىرعان. رەسپوندەنتتەردىڭ 40 پايىزى «ساعىنتاەۆتىڭ كومانداسى وزىنە جۇكتەلگەن مىندەتتى دۇرىس اتقارا المادى» - دەپ جاۋاپ بەرسە، 10%-ى بۇل وزگەرىستى ەلىمىزدىڭ ساياسي ەليتاسىنداعى اۋىس-تۇيىستەرمەن بايلانىستىرعان.

ساۋالناما بارىسىندا «ەكس-ۇكىمەت وتستاۆكاعا كەتۋگە لايىق بولدى ما؟» دەگەن دە ساۋال قويىلعان. بۇل سۇراققا جاۋاپ بەرۋدە رەسپوندەنتتەردىڭ ۇشتەن ءبىرى مەملەكەت باسشىسىنىڭ شەشىمىن تولىقتاي قولدايتىندىقتارىن ايتقان. ال 24%-ى «اراسىنداعى بىلىكسىزدەرىن عانا ورىندارىنان الىپ تاستاۋعا بولار ەدى» دەگەن جاۋاپتى تاڭداعان. 14%-ى «ءبىزدىڭ ەلدە كوپ نارسە ۇكىمەتكە بايلانىستى ەمەس» - دەپ جاۋاپ بەرگەن.

«جاڭا پرەمەر-مينيستر تاعايىندالىپ، ونىڭ جاڭا كابينەتى جاساقتالعاننان كەيىن، ەلدەگى جاعداي وزگەرە مە؟»  دەگەن سۇراققا. رەسپوندەتتەردىڭ 40%-ى، «بيلىككە ءدال سول ادامدار نەمەسە سولارعا ۇقساس ادامدار كەلەدى، بارلىعى سول كۇيىنشە قالادى» دەپ جاۋاپ بەرسە، ۇشتەن ءبىرى «جاڭا پرەمەر مەن جاڭا ۇكىمەت قاراپايىم حالىقتىڭ جاعدايىن جاقسارتاتىنا» سەنەتىندىكتەرىن ايتقان. ال 26%-ى «قازاقستاندا ۇكىمەتتىڭ وزگەرۋى ەشتەڭەگە دە اسەر ەتپەيدى، بىزدەگى جۇيە سولاي قالىپتاسقان» دەپ جاۋاپ بەرگەن.

زەرتتەۋ بارىسىندا رەسپوندەنتتەر مەملەكەت كومەگىنە كىمدەردىڭ، ياعني حالىقتىڭ قاي بولىگىنىڭ مۇقتاج ەكەنىن دە اتاعان.

كوپشىلىگى (41%) مەملەكەت ءبىرىنشى كەزەكتە كوپ بالالى وتباسىلاردى قامقورلىعىنا الۋى ءتيىس دەگەن. ال 26%-ى مەملەكەتتىك كومەكتىڭ باسىم كوپشىلىگى جاستارعا باعىتتالۋى كەرەك دەپ ەسەپتەيدى.

"The Qazaq Times"