ءماجىلىس توراعاسىنىڭ ورىنباسارى ۆلاديمير بوجكو. فوتو: Kazpravda.kz

«اقبوكەندەردىڭ جاپپاي قىرىلۋ سەبەبىن تابا المادىق». بۇل – ءماجىلىس توراعاسىنىڭ ورىنباسارى ۆلاديمير بوجكونىڭ ءسوزى. اتالعان ءسوز قر پارلامەنت ماجىلىسىندە براكونەرلىكپەن كۇرەس ماسەلەلەرىنە ارنالعان «دوڭگەلەك ۇستەلى» ۇستىندە ايتىلدى. 

اۋەلى  ماجىلىسىمەن جيىندا ماڭىزدى ماسەلە كوتەرىلىپ وتىرعانىن ايتا كەلىپ: «ءبىزدىڭ عىلىمي-زەرتتەۋ ينستيتۋتتارىمىز قايدا؟ زوولوگيا ينستيتۋتى نە ىستەپ وتىر؟» دەپ ءبىر شۇيلىكتى. ءسويتتى دە ءسوزىن بىردەن مويىنداۋ الپەتىندەگى سوزگە اۋىستىردى:

–       ءبىز ءالى كۇنگە دەيىن 200 مىڭ اقبوكەننىڭ نەدەن قىرىلعانىن تابا الماي وتىرمىز. مەن ۇكىمەتتە جۇمىس ىستەگەندە بىرەۋ تۇرادى دا، اقبوكەندەر پاستەرەللەزدەن قىرىلىپ قالدى دەيدى. ەكىنشىسى تاعى ءبىر سەبەبىن ايتادى. بىراق ءالى كۇنگە دەيىن ناقتى جاۋاپ جوق، – دەدى ۆ. بوجكو.

وسىلايشا، ايدىڭ-كۇننىڭ امانىندا ءجۇز مىڭداپ قۇرىپ كەتكەن اقبوكەننىڭ قىرىلۋ سەبەبىنە ناقتى جاۋاپ تابىلماعانىن تارىعا مويىنداعان ءماجىلىس توراعاسىنىڭ ورىنباسارى، جايىقتا جاپپاي قىرىلىپ جاتقان  بەكىرەنىڭ ول جەردە قايتىپ كوبەيەتىنىنە دە كۇمانمەن قارايتىنىن جەتكىزدى.

–       كاسپيدە كوكسەركە نەگە قىرىلىپ جاتىر؟ قازىر جايىق جاقتا ەكى شارۋاشىلىقتا بەكىرە بالىقتارى قىرىلىپ قالدى. وزەندە مۇزدىڭ استىندا ءولى بالىق قالقىپ ءجۇر. بىراق ءبارىمىز ءۇن-ءتۇنسىز وتىرمىز. كادىمگىدەي تىنىشتىق. ءتورت اي ءوتتى. بىراق سەبەبىن ەشكىم بىلمەيدى. بالىق كىمنىڭ كەسىرىنەن ۋلاندى؟ ەندى ول جەردە بەكىرەنىڭ كوبەيەتىنىنە كۇمانىم بار، – دەدى ول.  

كۇماندى ايتپاقشى، بۇل ءبىر ادامنىڭ سەنىمسىزدىگى دەڭىز. ال حالىقتىڭ كۇمانى شە: اقبوكەن قىرىلدى – جاۋاپسىز ءتورت جىل ءوتتى. بەكىرە قىرىلدى – ءلام-ميمسىز تاعى ءتورت اي ارتتا قالدى. «كادىمگىدەي تىنىشتىق». سوسىن دا ماجىلىسىمەننىڭ اۋەلگى سۇراعىن ءسىز دە ەرىكسىز قايتالايسىز: ءبىزدىڭ عىلىمي-زەرتتەۋ ينستيتۋتتارىمىز قايدا؟ زوولوگيا ينستيتۋتى نە ىستەپ وتىر؟

“The Qazaq Times”