موڭعوليا دەپۋتاتتارى پارلامەنت سپيكەرىن قىزمەتىنەن الىپ تاستادى.

Montsame اقپارات اگەنتتىگىنىڭ مالىمەتىنشە، قاڭتار ايىنىڭ 29-ى كۇنى وتكەن قۇپيا داۋىس بەرۋ بارىسىندا موڭعوليا دەپۋتاتتارى پارلامەنت سپيكەرى ميەگومبىن ەنحبولدانى قىزمەتىنەن الىپ تاستاعان. داۋىس بەرۋگە قاتىسقان 65 دەپۋتاتتىڭ 43-ءى ەنحبولدانى مەرزىمىنەن بۇرىن قىزمەتىنەن الىپ تاستاۋدى قولداعان.

2018 جىلدىڭ جەلتوقسان ايىندا 39 دەپۋتات ەنحبولدانىڭ ورنىنان كەتۋىن تالاپ ەتىپ، اشىق حات جولداعان. بىراق ول كەزدە پارلامەنت سپيكەرى دەپۋتاتتاردىڭ بۇل تالابىن ورىنداۋدان باس تارتقان.

قاڭتار ايىنىڭ 10-ى كۇنى ەل استاناسى ۇلان-باتىردا ميەگومبىن ەنحبولدا مەن ونىڭ جاقتاستارى موڭعول حالىقتىق پارتياسى جانە دەموكراتيالىق پارتيا وكىلدەرىنە قارسى ميتينگ وتكەن. بۇعان دەيىن پرەمەر-مينيستر ۋحنااگيني حۋرەلسۋح: «ميەگومبىن ەنحبولدا باستاعان توپ وزدەرىنە كەدەرگى جاساعانى ءۇشىن ەل ۇكىمەتىن قۇلاتپاق» - دەپ مالىمدەگەن.

ميەگومبىن ەنحبولدا 2018 جىلدىڭ 20 جەلتوقسان كۇنى «60 ميلليارد توگىرىك» ىسىندە اتى اتالدعان ءۇشىن ەتيكالىق جاۋاپكەرشىلىككە تارتىلعان. ونىڭ الدىندا باق بەتتەرىندە موڭعوليا حالىقتىق پارتياسى وكىلدەرىنىڭ مەملەكەتتىك قىزمەتتەردى ساتۋ ارقىلى 60 ميلليارد توگىرىك قارجى تابۋعا بولاتىندىعى جونىندە تالقىلاعان اۋديوجازبا جاريالانعان.

"The Qazaq Times"