نىعماتۋللين تسويعا ەكۆيليبريستيكا تۋرالى ەسكەرتىپ، دەپۋتاتتار سۇراققا الدى

قازاقستاندا 1 ملن 486 مىڭ ادامعا كوروناۆيرۋسقا قارسى ۆاكتسينانىڭ ءبىرىنشى دوزاسى ەگىلگەن. 1 اقپان مەن 4 مامىر ارالىعىندا شامامەن 401 مىڭ ادامعا، ياعني حالىقتىڭ 2,1%-ى ۆاكتسينانىڭ ەكى دوزاسىن تولىق العان. پارلامەنتتە ەكپە الاتىن كۇندەردىڭ مەرزىمىنە بايلانىستى داۋعا عان نۇكتە قويىلعانداي بولدى.

دەنساۋلىق ساقتاۋ ءمينيسترى الەكسەي تسوي سارسەنبى كۇنگى ءماجىلىس وتىرىسىنداعى مالىمدەسىندە ۆاكتسينانىڭ ەكى دوزاسى اراسىنداعى ۋاقىت 45 كۇننەن ارتىق بولمايدى دەدى.

ءساۋىر ايىنىڭ سوڭىنان باستاپ قازاقستاندا «سپۋتنيك V» ۆاكتسيناسىنىڭ قوس دوزاسىنىڭ ارالىق مەرزىمى 1,5 ايعا ۇزارتىلعان ەدى. وعان دەيىن 21 كۇننەن كەيىن ەكىنشى دوزاسىن سالىپ كەلگەن ەدى. 1 مامىردا باس سانيتار دارىگەر ەرلان قياسوۆ 90 كۇن ىشىندە ۆاكتسينا ەگۋگە بولادى دەپ مالىمدەگەن. تاۋەلسىز عىلىمي-مەديتسينالىق Medsupport ۇيىمى قياسوۆتىڭ بۇل شەشىمىنە قارسى شىعىپ، ادام ەكىنشى دوزا الماسا ۆيرۋس جۇقتىرىپ الۋى مۇمكىن دەپ دابىل قاققان.

سارسەنبى كۇنى، بۇگىن الەكسەي تسوي دەپۋتاتتىڭ «ۆاكتسينانىڭ ەكى دوزاسىن العان ادامدى ەگىلگەن ادام دەپ ساناۋعا بولا ما؟» دەگەن سۇراققا «ءيا» دەپ جاۋاپ بەردى.

«4 مامىرداعى جاعداي بويىنشا، 347 774 ادام ەكى كومپونەنتپەن دە ەگىلدى. دارىگەر رەتىندە ەكپەنىڭ  ەكى دوزاسىن العان ادام عانا ۆاكتسيناتسيالانعان دەپ سانالاتىنىن بىلەمىن. ءسىزدىڭ ۇستانىمىڭىز قانداي؟ ءسىز ءبىر دوزانى نەمەسە ەكى دوزانى العان ادامدى ۆاكتسيناتسيالانعان دەپ سانايسىز با؟»، – دەپ سۇرادى ءماجىلىس دەپۋتاتى مينيستردەن.

بۇل ساۋالعا «ەگەر بۇل ەكى دوزالىق ۆاكتسينا بولسا، وندا ارينە ۆاكتسينانىڭ ەكى دوزاسىن الۋ كەرەك» دەدى تسوي. مينيستر ەكپەنىڭ ءبىرىنشى دوزاسىن العاندارعا مىندەتتتى تۇردە ەكىنشىسى دە ەگىلەتىنىن العا تارتتى.

«ازاماتتارعا ءبىرىنشى كومپونەنتى سالىنسا، ەكىنشى كومپونەنتى 21 كۇننەن كەيىن «قۋىپ جەتەدى»، ەكىنشى دوزاسى ەڭ كوپ دەگەندە 45 كۇن ىشىندە سالىنادى. قالاي بولعاندا دا ازاماتتارىمىز ەكىنشى كومپونەنتىن الادى» دەدى مينيستر.

ونىڭ سوزىنە قاراعاندا، ۆاكتسينانىڭ ءبىرىنشى دوزاسى ەگىلگەن كۇننەن باستاپ 15 كۇن وتكەن سوڭ ادامداردا انتيدەنە پايدا بولا باستايدى.

ءماجىلىس توراعاسى نۇرلان نىعماتۋلين ەكپە دوزاسىنىڭ دەدلاينى مەن ۆاكتسيناتسيا ناۋقانىنىڭ باياۋ ءجۇرىپ جاتقانى جايلى دەپۋتاتتاردىڭ سۇراعىنان كەيىن «ەكۆيليبريستيكا» تۋىنداعانىن ايتىپ، سوزگە ارالاستى.

«جۋرناليستەرمەن، حالىقپەن كەزدەسكەندە قولدا بار تسيفرلاردى جاسىرماي، اشىق ايتىڭىز. ال مىناۋ ەكۆيليبريستيكا ءبارىنىڭ تەپە-تەڭدىگىن بۇزدى. قازىر عانا ەكىنشى دوزا 21 كۇننەن كەيىن ەگىلەدى دەدىڭىز. ال ورىنباسارلارىڭىزدىڭ ءبىرى 90 كۇن دەيدى. ءسىز ماكسيمۋم 45 كۇن دەپ وتىرسىز. بارلىعىن شاتاستىرىپ جىبەردىڭىز! ادامداردىڭ باسىن قاتىرمايىق. ەگەر ەكى ۆاكتسينا بولسا، دەمەك، ەكەۋىن دە سالدىرۋ قاجەت. ون بەس كۇننەن كەيىن انتيدەنە پايدا بولادى دەپ اقتالىپ جاتقانعا ۇقسايسىز، الەكسەي ۆلاديميروۆيچ. ەكى ۆاكتسينا العان ادام عانا ۆاكتسينالانعان دەپ سانالادى. مىنە، سولاردى ەسەپتەۋ كەرەك»، – دەدى سپيكەر نىعماتۋللين.

سونىمەن، داۋدىڭ سوڭىندا ەكپەنىڭ ەكى دوزاسىن تولىق العان ادام عانا ۆاكتسينالانعان دەپ ەسەپتەلەتىن بولدى.

قازىر ەلدە رەسەيلىك «سپۋتنيك V»، قازاقستاندىق QazVac جانە ءباا ەلىندە جاسالعان قىتايدىڭ Sinopharm كومپانياسىنىڭ Hayat-Vax ەكپەسى سالىنىپ جاتىر.

"The Qazaq Times"