اقش قىتاي بيلىگىنىڭ تيبەت جەرىنە شەتەلدىكتەردى كىرگىزبەۋىنە قارسى زاڭ قابىلدادى

اقش پرەزيدەنتى دونالد ترامپ سارسەنبى كۇنى «تيبەتكە ساياحات جونىندەگى بالاما زاڭعا» قول قويىپ، رەسمي اتقارۋعا بەردى. بۇل زاڭ قىتاي ۇكىمەتىنىڭ امەريكالىقتاردى قامتىعان وزگە شەتەلدىكتەردىڭ تيبەت جەرىنە كىرۋىنە شەكتەۋ قويعان ەرەجەلەرىنە قارسى تۇرۋعا باعىتتالعان.

«تيبەتكە ساياحات جونىندە بالاما زاڭ» جوباسىن وسى جىلدىڭ ءساۋىر ايىندا ماسساچۋسەتستەگى رەسپۋبليكاشىل سەناتورى مايكل ماكگوانمەن ۇسىنىپ، كونگرەستىڭ قوس پالاتاسى ءبىر اۋىزدان قابىلداعان.

اتالعان زاڭ جوباسىنىڭ تالاپتارىنا سايكەس، قىتاي ۇكىمەتى امەريكالىق جۋرناليستەرگە، ديپلوماتتار مەن تۋريستەرگە تيبەت جەرىندەگى شەكتەۋلى ورىندارعا بارۋىنا رۇقسات بەرۋى ءتيىس. سونداي-اق، «تيبەتكە ساياحات جونىندەگى بالاما زاڭى» بويىنشا اقش-تىڭ مەملەكەتتىك حاتشىسى بۇل ماسەلە جايىندا جىل سايىن كونگرەسكە بايانداما جاساۋعا مىندەتتى; قىتايلىق شەنەۋنىكتەردى ءتيىستى شەكتەۋگە الا وتىرىپ، ولاردىڭ قۇراما شتات تەرريتورياسىنا كىرۋىنە تىيىم سالا الادى.

قازىرگە دەيىن، قىتايلىق ديپلوماتتار، جۋرناليستەر، تۋريستەر، باسقا دا ازاماتتارى قۇراما شتات تەرريتورياسىندا ەركىن ءجۇرىپ-تۇرا الادى. الايدا، قىتاي تارابى اقش ازاماتتارىن تيبەت جەرىنە كىرۋىنە شەكتەۋ قويعان. قۇراما شتات تارابى ءوزارا تيىمدىلىك قاعيداسى نەگىزىندە قىتاي ۇكىمەتىنەن ازاماتتارىنا تەڭ قۇقىق بەرۋدى تالاپ ەتىپ وتىر.

زاڭ جوباسى 11 جەلتوقساندا سەناتتا ماقۇلدانعاننان كەيىن، اتالمىش زاڭنىڭ باستى قولداۋشىسى، رەسپۋبليكاشىل سەناتور رۋبيو مالىمدەمە جاساپ، قىتايمەن ءوزارا تيىمدىلىك قاعيداسىنا نەگىزدەلگەن قارىم-قاتىناس تاريحىندا مۇنداي جوبانىڭ ۇزاق ۋاقىتتان بەرى بولماعانىن ايتقان.

بۇل زاڭ جوباسى قابىلدانعاننان كەيىن، حالىقارالىق تيبەت قوزعالىس ۇيىمىنىڭ جەتەكشىسى ماتتەو: «بۇل شىن مانىندە اقش-تىڭ تيبەت حالقىن قولداعان جانە وڭىردەگى ستراتەگيالىق قاۋىپسىزدىك مۇددەلەرىن قورعاعان تاريحي سات»، – دەگەن پىكىرىن بىلدىرگەن.

اقش پرەزيدەنتى اتالمىش زاڭعا قول قويعاننان كەيىن، اقش مەملەكەتتىك حاتشىسى  90 كۇن ىشىندە تيبەتكە قانشا امەريكالىق ازاماتتاردىڭ كىرە العانىن، قىتاي ۇكىمەتى جاعىنان قانداي كەدەرگىلەر جاسالعانىن جانە بۇل كەدەرگىلەردى جاساپ وتىرعان شەنەۋنىكتەر تۋرالى اقش كونگرەسىنە مالىمەت بەرۋگە مىندەتتى. زاڭعا سايكەس، اقش ازاماتتارىنىڭ تيبەت اۆتونوميالى رەگيونىنا كىرۋىنە كەدەرگى كەلتىرگەن قىتايلى شەنەۋنىكتەردىڭ قۇرما شتات تەرريتورياسىنا كىرۋىنە شەكتەۋ قويىلادى.

“The Qazaq Times”