فرانتسياداعى ەرەۋىل: ماكرون ۋادەسىندە تۇرا ما؟

فرانتسيا پرەزيدەنتى ەممانۋەل ماكرون حالىققا ۇندەۋ جولداپ، ەكونوميكالىق رەجيم جاريالايتىنىن ايتتى.

Europe1 راديوسىنىڭ حابارلاۋىنشا، فرانتسيا پرەزيدەنتى مامىردان باستاپ بارلىق ەڭبەك جالاقىسىنا كەم دەگەندە 100 ەۋرو قوسىلاتىندىعىنا ۋادە بەردى. سونداي-اق، داعدارىس كەزىندە ونى ەركىن باسىپ ءوتۋ ءۇشىن ءاربىر كومپانيا وزدەرىنىڭ قىزمەتكەرلەرىنە جىلدىق بونۋس تولەۋى ءتيىس. وسىلايشا، فرانتسيا ۇكىمەتى حالىق تالابىن ەسكەرەتىنىن ءبىلدىردى. دەگەنمەن، فرانتسۋز حالقىنىڭ ءبىراز بولىگى ماكروننىڭ ۋادەسىنە سەنىم بىلدىرە قويمادى.

پرەزيدەنت ماكرون 2019 جىلدان باستاپ فرانتسيا ەكونوميكاسى بۇرىنعىدان نىعايىپ، جۇمىس بەرۋشىلەرگە جىل سوڭىندا قىزمەتكەرلەرىگە سىياقى تولەۋدى مىندەتتەپ، زەينەتكەرلەر مەن ازاماتتارعا قوسىمشا تابىس سالىعىن الىپ تاستايتىنىن مالىمدەدى. تەلەكوپىر ارقىلى حالىققا تىكەلەي ۇندەۋ جولداعان ماكرون قازىرگى جاعدايدىڭ ەندى قايتالانبايتىنىنا، بيلىك حالىقتىڭ مۇڭ-مۇقتاجىنا بەي-جاي قارامايتىنىن دا ايتتى. وسىدان كەيىن وpinionWay كومپانياسى  991 ادامنىڭ اراسىندا ارنايى ساۋالناما جۇرگىزىپ، تۇرعىنداردىڭ پرەزيدەنتكە سەنىم بىلدىرە قويمايتىنىن انىقتادى. ساۋالناماعا قاتىسۋشىلاردىڭ 50%-ى پرەزيدەنتتىڭ سوزىنە مۇلدە سەنبەيمىز دەسە، 49%-ى ۇندەۋدى جاقسى جاعىنان قابىلداعان. سۇراۋ سالعانداردىڭ 78%-عا جۋىعى ماكرون ۇسىنعان شارالار «سارى جەيدەلىلەر» قوزعالىسىن تۇبەگەيلى توقتاتا الادى دەگەن. ال 45%-ى نارازىلىق اكتسياسى جالعاسۋ قاجەت دەگەندى العا تارتادى. وسى رەتتە «سارى جەيدەلىلەر» قوزعالىسىنىڭ وكىلى كارل توكار: «پرەزيدەنتتىڭ ايتقانى تۇسىنىكسىز. ماكرون تومەنگى جالاقىعا 100 ەۋرو قوسامىن دەيدى. بۇل تىپتەن از. سەبەبى ونىڭ ۇستىنە تاعى سالىق سالىنىپ، جالاقىعا 80 ەۋرو مولشەرىندە عانا قوسىلادى. پرەزيدەنتتىڭ ۇندەۋىن تىڭداۋعا جينالدىق. بىراق، ماكرون ەشبىرىمىزدى سەندىرە المادى»، – دەيدى.

ءبىر ايعا سوزىلعان ەرەۋىل ەل قازىناسىنا كوپ مولشەردە شىعىن اكەلىپ، تۋريستەردىڭ لەگى باسەڭدەگەن. وتكەن اپتادا ماكرون ۇكىمەتتىڭ شۇعىل وتىرىسىن وتكىزىپ، جانارماي باعاسىنا موراتوري جاريالاۋ تۋرالى بۇيرىق بەرگەن بولاتىن. سوعان قاراماستان نارازىلىق اكتسيالارى قايتا جالعاستى. كەي ساراپشىلاردىڭ پىكىرىنشە، الداعى جىلى فرانتسيانى داعدارىس كۇتىپ تۇر. سونداي-اق، فرانتسيا بيلىگىنە «تىڭ سەرپىن» اكەلگەن ەممانۋەل ماكرون ۋادەسىنىڭ تولىقتاي جۇزەگە اسۋى ەكىتالاي. سولاي بولعان كۇننىڭ وزىندە، ەكونوميكانى قايتا قالپىنا كەلتىرۋ ءۇشىن كۇش سالۋ كەرەك.
17 قاراشادان بەرى فرانتسيادا جانارماي اكتسيزىن كوتەرۋگە قارسىلىق اكتسيالارى ءوتىپ جاتىر. كەي ايماقتاردا شەرۋدىڭ سوڭى تارتىپسىزدىككە ۇلاسىپ، بەس جۇزدەن استام ادام ۇستالدى. وقيعادان سوڭ پاريجدەگى سالتانات قاقپاسى اۋدانىندا پوليتسيا جانارماي سالىعىن كوبەيتۋگە قارسىلىق ءبىلدىرىپ شەرۋگە شىققان نارازىلاردى توقتاتۋ ءۇشىن پيروتەحنيكالىق گراناتتار قولدانعان. فرانتسيا ۇكىمەتىنىڭ اقپاراتى بويىنشا، جالپى ەل كولەمىندە شەرۋگە قاتىسۋشىلاردىڭ سانى 36 مىڭ ادامعا جەتكەن. ال پاريجدە شەرۋگە بەس جارىم مىڭ ادام شىققان. «سارى جەيدەلىلەردىڭ» تولقۋىنا قاتىستى ماكرون قازىرگى قيىندىقتىڭ نەگىزگى باسى وسىدان 40 جىل بۇرىنعى بيلىكتىڭ قاتە شەشىمدەرىنەن كەيىن باستالعانىن جانە قازىرگى جانارماي سالىعىنىڭ تىم قىمباتتاۋىنىڭ تاريحى دا تىم تەرەڭدە جاتقاندىعىن ايتتى.

"The Qazaq Times"