اقش: رەسەي ۋكرايناعا قاتىستى «اگرەسسيالىق ساياساتى» ءۇشىن جاۋاپ بەرەدى

اقش مەملەكەتتىك دەپارتامەنتى ۋاشينگتوندا وتكەن جيىندا رەسەي مەن ۋكراينا اراسىنداعى جاعدايدى تالقىلادى. جيىندا ايتىلعان ماسەلەلەر تۋرالى رەسمي www.state.gov سايتىنا جاريالاندى. 

دەپارتامەنت وكىلى: «ۋاقىت وتكەن سايىن رەسەيدىڭ قاتە ارەكەتتەرى ارتىپ كەلەدى. ال ءبىزدىڭ تاراپ سوعان ساي قاتاڭ شارالار قابىلدايتىن بولادى. ەگەر رەسەي ناتو مەن اقش-تىڭ ەسكەرتۋىنە قۇلاق اسپايتىن بولسا، ءبىز شىعىنداردى، سانكتسيالاردى ۇلعايتۋدى جالعاستىرامىز. ولار ۋكراينا ەكيپاجدارىن بوساتىپ، كەمەلەردى قايتارۋى كەرەك. سولاي جاساۋعا مىندەتتى»، – دەپ مالىمدەدى. جيىندا ۋكراينا مەن گرۋزيانىڭ اۋماقتىق تۇتاستىعى، ەگەمەندىگىن قولداۋ تۋرالى ۇسىنىستار قاراستىرىلعان. سونداي-اق قۇراما شتاتتار سىرتقى اۋماقتىق قاقتىعىستارعا جانە رەسەيلىك اگرەسسياعا قارسى ەكەندىگى ايتىلدى.

سەسسيا بارىسىندا كەرچ بۇعازىنداعى وقيعاعا ەرەكشە نازار اۋدارىلدى. اقش رەسەيلىك اگرەسسيا اكتىسىن ايىپتاپ، قىرىم اننەكسياسى مەن ۋكرايناعا باعىتتالعان جاعدايلاردى مىسالعا الدى. كەرچ بۇعازىنداعى رەسەيلىك اسكەري ەسكالاتسيا حالىقارالىق قۇقىق پەن ۋكراينا بوستاندىعىن بۇزۋ دەپ اتاپ ءوتتى.

وسىعان دەيىن قۇراما شتاتتارى گەرمانياعا «سولتۇستىك اعىن – 2» گاز قۇبىرىنىڭ كەلىسىمىن قايتا قاراۋدى ۇسىنعان. اقش «ەۋروپانىڭ ۋكراينانى اينالىپ وتەتىن گاز ينفراقۇرىلىمى كوپ بولعان سايىن رەسەيدىڭ اسكەري اگرەسسياسىنا توتەپ بەرۋ قيىنداي تۇسەدى» دەپ سانايدى. شىعىس پەن ورتالىق ەۋروپا ەلدەرى دە قۇبىر قۇرىلىسىنىڭ جالعاسۋىنا تۇبەگەيلى قارسى، ويتكەنى بۇل ءوز اۋماعى ارقىلى رەسەي گازىنىڭ ءترانزيتى ءۇشىن سالىق الا المايتىن ۋكرايناعا كوپ كولەمدە زيان كەلتىرەدى. ۋاشينگتون بۇل گاز قۇبىرى الداعى ون جىلدىقتاردا گەرمانيانىڭ رەسەيگە ەنەرگەتيكالىق تاۋەلدىلىگىن ارتتىرادى دەپ سانايدى.

ەسكە سالا كەتەيىك، 25 قاراشادا رەسەي ارنايى جاساعى ازوۆ تەڭىزىندە ۋكراينا اسكەري تەڭىز كۇشتەرىنە تيەسىلى ءۇش بىردەي كەمەگە شابۋىل جاساپ، باسىپ العان بولاتىن. وسىدان كەيىن ۋكراينا قاۋىپسىزدىك كەڭەسىنىڭ كەزەكتەن تىس وتىرىسى ءوتىپ، ەل پرەزيدەنتى پەتر پوروشەنكو سوعىس جاعدايىن ەنگىزگەن. ەكى ەل اراسىنداعى تەكەتىرەس ناتو مەن ەو ەلدەرىن جانە اقش-تى بەي-جاي قالدىرعان جوق. ناتو رەسەيدەن ۋكراينانىڭ اۋماقتىق تۇتاستىعىنا قۇرمەتپەن قاراۋدى تالاپ ەتسە، ۋاشينگتون ماسكەۋدى «اگرەسسورلىق مەملەكەت» دەپ ايىپتادى.

"The Qazaq Times"