Foto: static.ukrinform.com

AQŞ Memlekettik departamenti Uaşingtonda ötken jiında Resey men Ukraina arasındağı jağdaydı talqıladı. Jiında aytılğan mäseleler turalı resmi www.state.gov saytına jariyalandı. 

Departament ökili: «Uaqıt ötken sayın Reseydiñ qate äreketteri artıp keledi. Al bizdiñ tarap soğan say qatañ şaralar qabıldaytın boladı. Eger Resey NATO men AQŞ-tıñ eskertuine qwlaq aspaytın bolsa, biz şığındardı, sankciyalardı wlğaytudı jalğastıramız. Olar Ukraina ekipajdarın bosatıp, kemelerdi qaytaruı kerek. Solay jasauğa mindetti», – dep mälimdedi. Jiında Ukraina men Gruziyanıñ aumaqtıq twtastığı, egemendigin qoldau turalı wsınıstar qarastırılğan. Sonday-aq Qwrama Ştattar sırtqı aumaqtıq qaqtığıstarğa jäne reseylik agressiyağa qarsı ekendigi aytıldı.

Sessiya barısında Kerç' bwğazındağı oqiğağa erekşe nazar audarıldı. AQŞ reseylik agressiya aktisin ayıptap, Qırım anneksiyası men Ukrainağa bağıttalğan jağdaylardı mısalğa aldı. Kerç' bwğazındağı reseylik äskeri eskalaciya halıqaralıq qwqıq pen Ukraina bostandığın bwzu dep atap ötti.

Osığan deyin Qwrama Ştattarı Germaniyağa «Soltüstik ağın – 2» gaz qwbırınıñ kelisimin qayta qaraudı wsınğan. AQŞ «Europanıñ Ukrainanı aynalıp ötetin gaz infraqwrılımı köp bolğan sayın Reseydiñ äskeri agressiyasına tötep beru qiınday tüsedi» dep sanaydı. Şığıs pen Ortalıq Europa elderi de qwbır qwrılısınıñ jalğasuına tübegeyli qarsı, öytkeni bwl öz aumağı arqılı Resey gazınıñ tranziti üşin salıq ala almaytın Ukrainağa köp kölemde ziyan keltiredi. Uaşington bwl gaz qwbırı aldağı on jıldıqtarda Germaniyanıñ Reseyge energetikalıq täueldiligin arttıradı dep sanaydı.

Eske sala keteyik, 25 qaraşada Resey arnayı jasağı Azov teñizinde Ukraina äskeri teñiz küşterine tiesili üş birdey kemege şabuıl jasap, basıp alğan bolatın. Osıdan keyin Ukraina qauipsizdik keñesiniñ kezekten tıs otırısı ötip, el prezidenti Petr Poroşenko soğıs jağdayın engizgen. Eki el arasındağı teketires NATO men EO elderin jäne AQŞ-tı bey-jay qaldırğan joq. NATO Reseyden Ukrainanıñ aumaqtıq twtastığına qwrmetpen qaraudı talap etse, Uaşington Mäskeudi «agressorlıq memleket» dep ayıptadı.

"The Qazaq Times"