فوتو: cdn23

رەسەيدىڭ ۋكراينا شەكاراسىنداعى اسكەري بەلسەندىلىگى حالىقارالىق قاۋىمداستىقتاردى الاڭداتىپ وتىر. «ماسكەۋ اتىستى توقتاتۋ تۋرالى كەلىسىمدى ورەسكەل بۇزدى» دەگەن سولتۇستىك اتلانتيكالىق اليانس، ەۋرووداق پەن اقش ۋكراينانىڭ ەگەمەندىگى مەن اۋماقتىق تۇتاستىعىن قولدايتىنىن بىرنەشە مارتە مالىمدەدى.

قازىر رەسەيدىڭ تۇراقسىزداندىرۋشى ارەكەتتەرى ۋكراينانىڭ شىعىسىنداعى شيەلەنىستى ۋشىقتىرا باستاعان. وسىعان بايلانىستى اليانس مۇشەلەرى 1 ساۋىردە قارا تەڭىزدەگى جاعدايدى تالقىلادى. ناتو مالىمەتىنشە، اسكەريلەر قاقتىعىسى كەزىندە ءتورت ۋكراين ساربازى قازا تاپقان.

گەرمانيا مەن فرانتسيانىڭ سىرتقى ىستەر مينيسترلەرى تاراپتاردى ىنتىماقتاستىق بايلانىس ورناتۋعا شاقىرىپ، رەسەيگە ەسكەرتۋ جاسادى. ەو-نىڭ سىرتقى ساياسات جانە قاۋىپسىزدىك جونىندەگى جوعارعى وكىلى جوزەپ بوررەل بۇل ماسەلەنى ۋكراين تاراپىمەن ەۋرووداق ەلدەرى ءسىم باسشىلارىنىڭ تاياۋداعى سامميتىندە تالقىلاۋعا نيەتتى.

ناۋرىزدىڭ سوڭىندا تhe New York Times گازەتى ماسكەۋدىڭ ۋكراينا شەكاراسىنا 4000-عا جۋىق اسكەر جىبەرگەنىن جازدى. باسىلىمنىڭ مالىمەتىنشە، رەسەي 23 ناۋرىزدا اياقتالعان اسكەري جاتتىعۋلاردان كەيىن ۋكراينا شەكاراسىنا جاقىن ايماقتان اسكەر شىعارماعاندىقتان، اقش پەن ەۋرووداق بۇل جاعدايدى قاتاڭ باقىلاۋعا العان. سەبەبى شەكاراعا اسكەر جىبەرۋ – مەملەكەتتىڭ قاۋىپسىزدىگىنە نۇقسان كەلتىرۋى مۇمكىن. كەي ساراپشىلار كرەملدىڭ ەكى ەل شەكاراسىنا سارباز جىبەرۋىن «جاڭا سوعىسقا قادام» دەپ بولجاعان. 2036 جىلعا دەيىن بيلىكتە قالۋ مۇمكىندىگىنە يە بولعان پۋتين قىرىم اننەكسياسىنان كەيىن دونەتسك، لۋگانسكتى فەدەراتسيا قۇرامىنا قوسىپ السا، «جاڭا رەسەي» تۇجىرىمى قالىپتاسۋى بەك مۇمكىن. ال بۇل ءپۋتيننىڭ بيلىك ەتۋ مەرزىمىن تاعى دا ۇزارتۋعا مۇمكىندىك بەرەدى.

سونىمەن بىرگە، الەۋمەتتىك جەلىلەردە رەسەي بريانسك، ۆورونەج جانە روستوۆ وبلىستارىنا، اننەكسيالانعان قىرىمعا دا اسكەريلەر جىبەرىپ جاتقاندىعى تۋرالى حابارلامالار جاريالاندى.

بۇل حابارعا حالىقارالىق قاۋىمداستىقاردىڭ نازارى اۋعاننان كەيىن ءپۋتيننىڭ ءباسپاسوز حاتشىسى دميتري پەسكوۆ 1 ساۋىردە مالىمدەمە جاساپ، «رەسەي ءوز اۋماعىندا قارۋلى كۇشتەردى قالاي قولداناتىنىن ءوزى شەشەدى جانە بۇعان الاڭداۋشىلىق تانىتۋدىڭ قاجەتى جوق»، – دەدى.

كەيىننەن لوندون مەن كيەۆ شيەلەنىستىڭ ۋشىعۋىنا جول بەرمەۋ ماقساتىندا حالىقارالىق سەرىكتەستەرمەن ۋكراينا شەكارالارىنداعى جاعدايدى باقىلاۋعا كەلىستى.

رەسەي ۋكراينانىڭ قىرىم تۇبەگىن 2014 جىلى ناۋرىزدا زاڭسىز اننەكسيالاپ الىپ، تۇبەكتەگى اسكەري الەۋەتىن كۇشەيتە باستاعان. 2014 جىلى كوكتەمدە ۋكراينانىڭ شىعىسىنداعى دونەتسك جانە لۋگانسك وبلىستارىندا رەسەيشىل سەپاراتيستەر مەن ۇكىمەت اسكەرى اراسىندا قاقتىعىس باستالعان.

ۋكراينا مەن باتىس ەلدەرى ماسكەۋدى سەپاراتيستەرگە قولداۋ كورسەتىپ وتىر دەپ ايىپتايدى. بىراق كرەمل مۇنى جوققا شىعارادى. الايدا، 2016 جىلى قاراشادا حالىقارالىق قىلمىستىق سوت ۋكراينا شىعىسىنداعى قاقتىعىستى «ۋكراينا مەن رەسەي اراسىنداعى حالىقارالىق قارۋلى قاقتىعىس» دەپ تانىعان. امەريكا مەن ەۋرووداق ەلدەرى قىرىمدى رەسەي جەرى رەتىندە مويىنداعان ەمەس.

"The Qazaq Times"