فوتو: telegraf.com

جامبىل وبلىسىندا اسكەري جاتتىعۋ كەزىندە قار كوشكىنى ءجۇرىپ، جەتى ادام قازا تاپتى، - دەپ حابارلايدى Tengrinews.kz ءتىلشىسى قر ءىىم-ءنىڭ توتەنشە جاعدايلار دەپارتامەنتىنىڭ رەسمي وكىلى رۋسلان يمانقۇلوۆقا سىلتەمە جاساپ. 

قر ءىىم-ءنىڭ توتەنشە جاعدايلار دەپارتامەنتىنىڭ رەسمي وكىلى رۋسلان يمانقۇلوۆتىڭ مالىمەتىنشە قازىرگى ۋاقىتتا 10 اسكەري قىزمەتكەر قۇتقارىلعان. "قازىرگى ۋاقىتتا 91678 اسكەري ءبولىمىنىڭ قىزمەتكەرلەرى مەن جەدەل جاردەم قىزمەتىنىڭ (بارلىعى 60 ادام) وقيعا ورنىندا ىزدەستىرۋ-قۇتقارۋ جۇمىستارى جۇرگىزىلىپ جاتىر. تاعى 75 ادام، ياعني قۇتقارۋ قىزمەتىنىڭ جەكە قۇرامى جانە جەتى ارنايى تەحنيكا تاراز قالاسىنان جونەلتىلگەن. قار كوشكىنى سالدارىنان قازا تاپقان جەتى ادامنىڭ ءمايىتى تابىلعان", - دەدى ول.

ەسكە سالايىق، جامبىل وبلىسىندا كوكساي شاتقالىندا 91678 اسكەري ءبولىمىنىڭ جوسپارلى اسكەري دايىندىق بارىسىندا ويلاماعان جەردەن قار كوشكىنى ءجۇردى. "قر ءىىم-ءنىڭ توتەنشە جاعدايلار كوميتەتىمەن بىرلەسە وتىرىپ، ىزدەستىرۋ-قۇتقارۋ جۇمىستارى جۇرگىزىلىپ جاتىر. "وڭتۇستىك" وڭىرلىك باسقارماسىندا قولباسشىنىڭ باسشىلىعىمەن جەدەل شتاب قۇرىلعان. وسى وقيعاعا بايلانىستى ىستەلگەن شارا جايىندا كەيىنىرەك تولىقتىرىپ حابارلاناتىن بولادى", - دەدى ۆەدومستۆوداعىلار.

“The Qazaq Times”