جارىلىس بولعان كۇنى سول كەزدەگى قورعانىس ءمينيسترى نۇرلان ەرمەكباەۆپەن كەلگەن ۆەدومتسۆونىڭ باس ينسپەكتسيا باسقارماسى باسشىسى جۇمابەك حاسەنوۆ QT رەداكتسياسىنىڭ تىلشىسىنە ءالى تابىلماي جاتقان اسكەري قىزمەتكەر باۋىرجان داۋىتباەۆتى ىزدەستىرۋ جالعاسىپ جاتقانىن حابارلاپ، جۇمىس بارىسىن ايتىپ بەردى.
جارىلىس كەزىندە وقيعا ورنىندا بولعان 33 جاستاعى باۋىرجان داۋىتباەۆتان ون كۇننەن بەرى حابار جوق. اسكەري ءبولىمنىڭ ورتكە قارسى قۇتقارۋ بولىمشەسى باسشىسى قىزمەتىن اتقارعان كىشى سەرجانتتى ىزدەۋگە قارۋلى كۇشتەر، تج، اكىمدىك، ەرىكتىلەر مەن اۋدان تۇرعىندارى كۇش بىرىكتىرگەن.
«ىزدەستىرۋ جۇمىسىنا 55 اۋىر جانە ارنايى تەحنيكا، 300-دەن اسا وفيتسەر مەن جاۋىنگەر، 93 ساپەر، 10 كينولوگ مامان مەن ءيىسشىل يت جۇمىلدىرىلعان. ءۇش بىردەي اسا سەزىمتال ۇشقىشسىز باسقارىلاتىن اپپارات ارقىلى 100 شاقتى شاقىرىم اۋماق باقىلانىپ جاتىر. اتا-اناسى مەن تۋىستارىنىڭ سۇراۋىمەن اسكەري بولىمنەن 10-15 شاقىرىم راديۋستا تاۋ جاقتا 10 اتتى پارۋل قاراپ جاتىر. كىم بىلەدى كونتۋزيا العان سوڭ كەتىپ قالدى ما دەگەن ويمەن تاۋ جوتاسى، رىسقۇلوۆ، مەركى اۋداندارىنداعى اسكەري بولىمدەر دە ىزدەۋدە»، – دەيدى قورعانىس مينيسترلىگىنىڭ رەسمي وكىلى جۇمابەك حاسەنوۆ.
قورعانىس مينيسترلىگىنىڭ باس ينسپەكتسيا باسقارماسى باسشىسى جۇمابەك حاسەنوۆ. فوتو-سكرين: 31 ارنا / ينفورمبيۋرو جاڭالىقتار باعدارلاماسى
ونىڭ ايتۋىنشا، جاۋاپتىلار داۋىتباەۆتى اسكەري ءبولىم اۋماعىنان تابىلارىنا سەنىمدى. رەسمي بولجامعا قاراعاندا، جاۋىنگەردىڭ سىرتقا شىعىپ، ۇزاي قويۋى ەكىتالاي. حاسەنوۆ ىزدەۋ بارىنشا قارقىندى ءجۇرىپ جاتقانىنا سەندىرۋگە تىرىسىپ باقتى.
– تاڭعى ساعات 7.00 مەن كەشكى 20.00 ارالىعىندا ىزدەۋ جۇمىسى ءۇزىلىسسىز كۇندەلىكتى جۇرۋدە. پرەزيدەنت پەن مينيستر تاپسىرماسى بويىنشا ءارى ازاماتتىق-قىزمەتتىك پارىزىمىزعا ساي، قالاي بولعانداي دا باۋىرجان داۋىتباەۆ تابۋىمىز قاجەت. اسكەري بولىمدە ەكسكاۆاتور، تراكتوردىڭ كۇشىمەن توبە-توبە بوپ ۇيىلگەن توپىراقتى كوتەرىپ-اۋىستىرىپ جاتىرمىز. جينالعان سۋ قويىندىسىن سورىپ-تەكسەرۋدەمىز. جوعالعان ازماتتىڭ تۋىستارى قاسىمىزدا. جەرگىلىكتى حالىققا مىڭ دا ءبىر راقمەت، اسكەري ءبولىم سىرتىندا كولىك، موتوتسيكل، اتتىسى بار ءبارى بىرىگىپ ىزدەسۋگە اتسالىسىپ ءجۇر، – دەيدى ول.
مينيسترلىك وكىلى باۋىرجاندى كورگەن بولۋى مۇمكىن دەگەن ءتۇرلى اقپاراتقا ۋاقتىلى رەاكتسيا ءبىلدىرىپ، ىزدەۋ جۇمىسىن كەڭەيتىپ، دەرەۋ تەكسەرىپ جاتقانىن جەتكىزدى. سونداي حاباردىڭ ءبىرى، مالشى تاۋ شاتقالىنان كورىپتى دەگەن مالىمەت. بۇل جونىندە حاسەنوۆ «قاۋەسەت-جالعان» ەكەنىنە كوز جەتكىزگەنىن ايتتى.
«بۇل حابار شىققان بويدا كومانديردىڭ تاربيە جونىندەگى ورىنباسارى پودپولكوۆنيك رۋسلان جۇكەباەۆ 2 كولىكپەن بارىپ قايتتى. قويشىنى تاۋىپ، تىلدەستى. سويتسە مالشى ىشىمدىك ءىشىپ، ماساڭ كۇيدە تاراتقان نەگىزسىز ءسوز بولىپ شىقتى. سول ماڭايدا اياق كيىمنىڭ ءىزىن تەكسەرىپ كوردىك. جىگىتتىڭ قىزمەتتىك اياق كيىمى مەن ولشەمىنە سايكەسپەيدى. لۋگوۆوي اۋىلدىق وكرۋگىندە دە وسىنداي اقپارات ايتىلدى. سونداعى اسكەري ءبولىمنىڭ ماماندارى بارىپ، ءمان-جاعدايدى انىقتادى. كۇدىكتى باسپاناسىز ماسكۇنەم ادام ەكەن. داۋىتباەۆقا ەش قاتىسى جوق. مۇنداي قاۋەسەتتەر از ەمەس»، – دەدى.
جامبىل وبلىسىندا جارىلعان اسكەري بولىمگە وتەر جولداعى پوستتا جۇرت جاقىنىنان حابار توسىپ تۇر. وقيعا ورنىن تازارتۋ جانە جوعالعان قىزمەتكەردى ىزدەۋ جۇمىسى ءالى جالعاسىپ جاتىر. فوتو: QT / كۇلتەگىن اسپانۇلى
سونداي-اق، اسكەري ىزدەۋگە قوسا تۋىستارى ءۇمىت كوزىن ىزدەپ كورىپكەلدەردىڭ كومەگىنە جۇگىنگەن كورىنەدى. ىزدەۋ شاراسىنىڭ بارىسىن بايانداۋعا جاۋاپتى جۇمابەك حاسەنوۆ «ماماندار ءتىپتى ساۋەگەي-كورىپكەلدەردىڭ ايتقان جەرىن قازىپ-قاراپ جاتىر» دەدى.
«كوپ اقپاراتتى ايتا المايمىن. بىزدە باسقا دا نۇسقالار بار. قايعىرىپ وتىرعان كەزدە مۇنىڭ ءبارىن ايتۋ اۋىر. سونىڭ ءبىرى، اۋماقتا ادام دەنەسىنىڭ كەي بولشەكتەرى تابىلدى، سونى دنق ساراپتاماسىنا جولدادىق. زەرتحانا تالداۋىنىڭ قورىتىندىسىن توسىپ وتىرمىز»، – دەپ ءسوزىن تولىقتىردى باسقارما باسشىسى حاسەنوۆ.
داۋىتباەۆ پەن ادىلبەكتىڭ تۋىستارىنا ىزدەستىرۋ جۇمىسىنىڭ بارىسى جايلى بايانداپ، اسكەري بولىمگە قايتا كەتىپ بارا جاتقان مينيسترلىك وكىلى جۇمابەك حاسەنوۆ. 30 تامىز 2021 جىل. جامبىل وبلىسى، بايزاق اۋدانى. فوتو: QT/ كۇلتەگىن اسپانۇلى
حابار-وشارسىز كەتكەنىنە ون كۇنگە جۋىقتاعان باۋىرجان داۋىتباەۆتىڭ ءتورت پەرزەنتى بار جانە جولداسىنىڭ اياعى اۋىر. №28349 اسكەري ءبولىمنىڭ ماڭايىنان باۋىرىن اۋىل تۇرعىندارىمەن بىرگە ىزدەگەن ەربول داۋىتباەۆ جانە ونىڭ تۋىستارى بلوك-بەكەتتىڭ اۋزىندا كۇندە حابار توسىپ وتىر. ولار قاتتى جارىلىستان ەسىن جوعالتىپ تاۋ-تاس اراسىن باسساۋعالاپ، اداسىپ كەتكەن بولۋى مۇمكىن دەپ ۇمىتتەنەدى.
26 تامىزدا جامبىل وبلىسى بايزاق اۋدانىنداعى اسكەري بولىمدە بولعان جويقىن جارىلىستان 113 وق-ءدارى قويماسىنىڭ تەك ۇشەۋى ءبۇتىن قالعان. تەك قورعانىس نىسانى عانا ەمەس، اسكەري ءبولىمنىڭ تۇبىندە ورنالاسقان قاينار اۋىلى مەن جاقىن ماڭايداعى وزگە ەلدى مەكەندەردەن 106 تۇرعىن ءۇي، قوعامدىق ورىن سانالاتىن 18 عيمارات بۇلىنگەن.
ەكى جىلدىڭ ىشىندە ەكىنشى مارتە قايتالانعان اپاتتان 15 ادام قازا تاپقان, ءجۇز شاقتى ادام ءتۇرلى دەڭگەيدە جارالانعان. وقيعا كۇنى مىڭداعان تۇرعىن بوسىپ، ەۆاكۋاتسيالانۋعا ءماجبۇر بولدى.
الماتى وبل پركۋراتۋراسى. بەلسەندىلەر: «جالعان جالامەن قاماۋداعى ايگەرىم مەن دۋمانعا بوستاندىق!»
ارمان الىمبەكوۆ: مەن ول جەردىڭ رەزيدەنتسيا ەكەنىن بىلمەدىم. ەشنارسە بۇلدىرمەدىم.
قوساي ماحامباەۆ: وق تيگەن ادامدى قۇتقارام دەگەندە ءوزىمدى اتىپ تاستادى
رەزيدەنتسيا ءىسى. ورىنعازى سەرىكبول: بەيبىت شەرۋگە شىقتىم. ال، 269 باپتى مويىندامايمىن
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى