فوتو: bilim-all.kz

قازاقستاندا ۇستازدار جەتىسپەۋشىلىگى جوق. بۇل تۋرالى ورتالىق كوممۋنيكاتسيا بريفينگىندە ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا مالىمدەدى.

ۆيتسە-مينيستر: «قازىرگى تاڭدا ايماقتاردا ەسەپكە الۋ جۇمىستارى جۇرگىزىلۋدە. سونىمەن قاتار بىلىكتىلىكتى ارتتىرۋ جۇمىستارىدا جولعا قويىلعان. سوندىقتان دا ۇستازدار تۋرالى سۇراق جوق دەسەم دە بولادى. بۇگىندە ءبىزدىڭ نەگىزى سۇراق مۋلتيمەديالىق قوندىرعىلاردىڭ باعدارلامالارى ارقىلى وقۋشىلاردى، ۇستازداردى، ديرەكتورلاردى دايارلاۋ» دەپ ءوز پىكىرىن ءبىلدىردى.

الايدا، از ايلىقپەن قىرۋار جۇمىس اتقارىپ جاتقان ۇستازداردىڭ شاعىمى ءار كەزەڭدە دە توبە كورسەتىپ تۇراتىندىعى جاسىرىن ەمەس. سەبەبى قاعازبەن سوعىستىڭ سوڭىنا جەتە الماي كەلە جاتقان مۇعالىمدەردىڭ جۇمىسى كۇن سايىن ارتپاسا، ازايار ەمەس.

دەسە دە، وسىدان ءبىراز ۋاقىت بۇرىن پرەزيدەنت نازارباەۆ قازاقستان حالقىنا جولداۋىندا ۇستازداردى ەسىنە الىپ: «جەرگىلىكتى جەرلەردە مۇعالىمدەرگە كەز كەلگەن جۇمىس تاپسىرىلادى. مۇعالىمدەر سايلاۋ وتكىزەدى. ناسيحات جۇمىستارىن دا ۇستازدار جۇرگىزەدى. بىرنارسە قاجەت بولسا، مۇعالىمدەر جىبەرىلەدى. ول ءۇشىن ولارعا ەشكىم اقشا تولەمەيدى. بۇل جۇمىستاردان ۇستازداردى بوساتۋ كەرەك. ولار ساباققا دايىندالۋ ءتيىس. ۋاقىتىندا عانا جۇمىس ىستەۋى قاجەت. ءتىپتى ولاردى ورىنسىز تەكسەرە بەرەدى. اتالعان زاڭ وسى ءۇشىن قاجەت»، - دەپ پەداگوگتاردىڭ مارتەبەسىن كوتەرۋگە قاتىستى زاڭ قابىلداۋ قاجەت دەپ مالىمدەدى.

پرەزيدەنتتىڭ بۇل مالىمدەمەسىنەن كەيىن ۇستازدار قاۋىمى ءبىر سەرپىلىپ قالدى. وزدەرىنىڭ بۇل مەملەكەتكە ءالى دە بولسا كەرەك ەكەنىن سەزىنگەن مۇعالىمدەر كوڭىلىندە سەنىم وتى تۇتانعانى جاسىرىن ەمەس. بىراق قازاقستان تاۋەلسىزدىك العالى بەرى ءبىلىم سالاسىنىڭ رەفورمادان كوز اشپاي كەلە جاتقانىن ەسكەرسەك، ولاردىڭ بۇل سەنىمى بەكەر ەكەنىن تۇسىنەسىڭ. سەبەبى الدىڭعى ءبىلىم مينيسترلەرى سياقتى قازىرگى ءبىلىم جانە عىلىم ءمينيسترى ەرلان ساعاديەۆ تە رەفورما جاساۋدا الدىنا جان سالماۋدا. مۇعالىمدەردىڭ ءبىلىمى مەن قاعازباستى جۇمىس كەستەسىن بىلاي قويعاندا، ۇبت زاڭدىلىقتارىنىڭ ءوزى وسى ۋاقىتقا دەيىن سان مارتە وزگەردى. پرەزيدەنتتىڭ سوڭعى جاساعان جولداۋىنا قاراپ، بۇل وزگەرتۋلەر الداعى ۋاقىتتا توقتامايتىن ءتارىزدى. ساعاديەۆ باستاعان «رەفورماتور ساڭىلاقتار» ءبىلىم سالاسىنا ءالى تالاي «نوۋحاۋ جاڭالىقتار» الىپ كەلەتىنى بەلگىلى. «ءبىلىم سالاسى» دەپ اتالاتىن «ساعاديەۆ سىناق الاڭى» امان بولسا، ۇستازدار مەن وقۋشىلار ەش ۋاقىتتا «رەفورمالانۋدان» تىس تالمايتىنى انىق...

"The Qazaq Times"