AQŞ prezidenti Donal'd Tramp. Foto: newsbuzz

6 qaraşada jergilikti uaqıt boyınşa AQŞ-ta Kongress saylauı bastaladı. Kezekti sayasi şaranıñ memleket üşin mañızı zor bolmaq.

Saylau kezinde amerikandıqtar Qauımdar palatasınıñ 435 deputatın, 100 senatordıñ 35-in jäne är ştattan gubernatorlıqqa ümitkerlerge dauıs beredi. Aldın-ala saualnama qorıtındısı boyınşa, Qwrama Ştattarında 31 millionnan astam twrğın merzimnen tıs dauıs bergen. Ötken jolğı Kongreske aralıq saylaumen salıstırğanda bwl nätije äldeqayda joğarı. Mäselen, 2014 jılı tek 19 million adam merziminen bwrın öz tañdauın jasağan.

Kongerstiñ eki palatasında da respublikalıqtar köş bastap twr. «The New York Times» basılımında key sarapşılar bwl sayasi şarağa «Donal'd Tramp äkimşiligine qatıstı referendum» dep bağa bergen. Aralıq saylauda respublikalıqtar jeñiske jetse, Tramp äkimşiligi kezekti märte iri basımdıqqa ie boladı. Osı rette Aq üy basşısı Donal'd Tramp: «Sizder elimizge migranttar kerueni ağılıp, qılmıstardıñ artqanın qalasañızdar demokrattarğa dauıs berseñizder boladı. Al eger şekaramız berik, wlttıq qauipsizdik mığım jäne qoğamdıq tärtiptiñ saqtalğanın qalasañızdar respublikalıqtardı tañdañızdar»,– dep qısqa qayırdı. AQŞ-tıñ 44-şi prezidenti Barak Obama aralıq saylau bastalğalı jer-jerde sayasi nauqan, arnayı jiın wyımdastırıp ülgerdi. Ol: «Birneşe uaqıt köleminde elimiz köptegen iri jetistikterge jetti. Endi bizdiñ elimizdiñ ne qalaytını osı saylauda belgili bolmaq. Halıq osı jolı bwrınğıdan da ayrıqşa belsendilik tanıtıp keledi. Meniñşe, bwl – jaqsı jañalıq. Öz basım, halıqtıñ qazirgi belsendiligine köp ümit artamın»,– dedi.

Kezekti sayasi şaranıñ AQŞ üşin mañızı zor. Foto: www.bbc.com

Amerikada aralıq saylauğa deyin aldın-ala şaralar jürgizilip, AQŞ qwqıq qorğau organdarı saylauşılarğa Resey, Iran jäne basqa da elderdiñ äleumettik jelilerdegi jalğan aqparattarınan saqtanu kerektigin eskertti. Ötken aptada jürgizilgen zertteuler boyınşa, AQŞ-ta 6 qaraşada ötetin Kongreske aralıq saylau qarsañında äleumettik jelilerde dezinformaciya 2016 jılğı prezident saylauı kezindegiden de tez taralıp jatqanı anıqtaldı. Osığan oray Facebook äleumettik jelisi 115-ten astam küdikti jäne feyk akkaunttardı bwğattağan. Joyılğan akkaunttardıñ basım böligi Resey men Iran qoldanuşılarına tän. Resmi Uaşington hakerlerdiñ, olardıñ işinde Reseydiñ sayasi jağdaylar men kandidattarğa qatıstı ötirik habar taratıp, qoğam arasında alauızdıq tuğızıp, pikir qayşılığın tuındatu äreketterinen ülken qauip barın mälimdegen.

"The Qazaq Times"