رەسمي استانا مەن ماسكەۋ قارىم-قاتىناسى كۇن وتكەن سايىن ۋشىعۋدا.

قاراشا ايىنىڭ 1-ءى كۇنى قازاقستان پرەمەر-ءمينيسترى باقىتجان ساعىنتاەۆ پەن رەسەي ۇكىمەت باسشىسى دميتري مەدۆەدەۆ ەكىجاقتىق قارىم-قاتىناستى ودان ارى دامىتۋعا بايلانىستى كەلىسسوزدەر جۇرگىزەدى جانە 9 قاراشا كۇنى وتەتىن نۇرسۇلتان نازارباەۆ پەن ۆلاديمير ءپۋتيننىڭ كەزدەسۋىنىڭ العىشارتتارىن دايىندايدى.

نازارباەۆ پەن پۋتين 9 قاراشا كۇنى پەتروپاۆل قالاسىندا شەكاراارالىق ىنتىماقتاستىق فورۋمى اياسىندا كەزدەسۋ وتكىزەدى دەپ كۇتىلۋدە. ساراپشىلار پىكىرىنشە، بۇل جولعى كەزدەسۋدە قوس تاراپ رەسەيدىڭ ەۋرازيالىق ەكونوميكالىق وداققا مۇشە ەلدەردى اقش سانكتسياسىنا قارسى بىرلەسىپ كۇرەسۋ جونىندەگى باستاماسىن تالقىلاۋى مۇمكىن.

جالپى، سوڭعى ۋاقتتارى رەسمي ماسكەۋ ءوزىنىڭ ەۋرازيالىق ەكونوميكالىق وداق اياسىنداعى ارىپتەستەرىن بىرلەسىپ اقش-قا قارسى كونترسانكتسيا سالۋعا ءجيى شاقىرۋدا. رەسەيدىڭ بۇل باستاماسى امەريكا ەكونميكاسىمەن سالىستىرعاندا «بالانىڭ ويىنشىعىنداي» بولىپ قالاتىن قازاقستان، قىرعىزستان، ارمەنيا جانە بەلارۋسكە ءتيىمسىز ەكەنى ايتپاسا دا تۇسىنىكتى. ونىڭ ۇستىنە رەسەيدىڭ بۇل باستاماسى قازاقستاننىڭ ۇزاق جىلدار بويى ۇستانىپ كەلە جاتقان كوپ ۆەكتورلى ساياساتىنا دا كەرەعار. دەسە دە، رەسمي ماسكەۋ ءوزىنىڭ اقش-پەن اراداعى ساۋدا سوعىسىنا ەۋرازيالىق ەكونوميكالىق وداقتاعى ارىپتەستەرىن تارتۋىن توقتاتار ەمەس.

ساياساتتانۋشى، دوسىم ساتباەۆتىڭ پىكىرىنشە، ەگەر رەسمي استانا ماسكەۋ باستاماسىن قولدايتىن بولسا، وندا ول بولاشاقتا قازاقستان ەكونوميكاسىنا ۇلكەن پروبلەمالار الىپ كەلۋى مۇمكىن.

«رەسەيمەن سالىستىرعاندا قازاقستاننىڭ سىرتقى ساياساتى ديپلوماتيالىق تۇرعىدان عانا ەمەس، ەكونوميكالىق تۇرعىدان دا كوپ ۆەكتورلى. قازىر رەسەيدىڭ اقش پەن ەۋرووداقتىڭ بىرقاتار ەلدەرىمەن ساۋدا سوعىسىن جۇرگىزىپ جاتقانى بەلگىلى. بىراق قازاقستاننىڭ ءبىرىنشى كەزەكتەگى ساۋدا سەرىكتەستەرى رەسەي نەمەسە قىتاي ەمەس، ءدال وسى ەۋرووداق ەلدەرى. استاناعا بۇل ماسەلەگە ارالاسۋ ءتيىمسىز» - دەپ ەسەپتەيدى دوسىم ساتباەۆ.

حالىقارالىق ساراپشىلاردىڭ سوزىنشە، رەسەيدىڭ سوڭعى ۋاقىتتارى قازاقستان تاۋارلارىن ءوز اۋماعىنا وتكىزبەي قويۋى ءدال وسى اقش-قا سالىنۋى ءتيىس كونترسانكتسيا توڭىرەگىندە بولىپ جاتقان ساياسي ويىنداردىڭ ءبىر بولىگى. رەسمي ماسكەۋ ءوزىنىڭ وسى ءىس-ارەكەتى ارقىلى استاناعا قىسىم كورسەتكىسى كەلەدى. بىراق وسى ۋاقىتقا دەيىن قازاقستان بيلىگى رەسەيدىڭ بۇل ارەكەتىنە قانداي دا ءبىر جاۋاپ قاتپاعان جانە ماسكەۋ باستاماسىن قولداۋعا ەشقانداي نيەت بىلدىرمەگەن.

"The Qazaq Times"