مۇراگەر حانزادا العاش رەت حاشوگگي ىسىنە بايلانىستى پىكىر ءبىلدىردى

جۋرناليست جامال حاشوگگي ساۋد ارابياسىنىڭ ستامبۋلداعى باس ەلشىلىگىندە ولتىرىلگەنىنە ءۇش اپتا وتكەننەن كەيىن عانا مۇراگەر حانزادا مۇحاممەد بين سالمان ءوزىنىڭ العاشقى پىكىرىن جاريا ەتتى. ول سارسەنبى كۇنى مالىمدەمەسىندە «حاشوگگي ءولىمى شەكتەن اسقان قىلمىس» دەپ باعالاعان.

مۇحاممەد بين سالمان بۇل پىكىرىن ەر-ريادتاعى ينۆەستيتسيالىق فورۋم كەزىندە ورتاعا سالعان. ول سوزىندە: «بۇل قاستاندىق ساۋد ارابيالىقتار ءۇشىن وتە اۋىر. ءتىپتى الەمدەگى كەز-كەلگەن ادام ءۇشىن دە كەشىرۋگە كەلمەيتىن قىلمىس»، – دەگەن. ءارى سوزىندە قاستاندىق جاساۋشىلار ءسوزسىز جازالاناتىنىنا سەنىم بىلدىرگەن.

وسىعان دەيىن ساۋد بيلىگىنىڭ حاشوگگي ولىمىنە بايلانىستى بەس جوعارى لاۋازىمدىنى قىزمەتتەن بوساتىپ، 18 ادامدى قاماۋعا العانى ءمالىم بولعان ەدى. حانزادا بين سالمان حاشوگگي ءىسىن تەرگەۋگە ساۋد ارابياسى ۇكىمەتى تۇركيامەن سەلبەستىك ورناتاتىنىن جەتكىزدى.

بۇدا بۇرىن اقش پرەزيدەنتى دونالد ترامپ حاشوگگي ءىسىنىڭ اقىرعى جاۋاپتى ساۋد ارابياسىنىڭ تاق مۇراگەرى بەرەتىنىن ايتقان ەدى. ول اقش-تاعى WSJ باسىلىمىنا بەرگەن سۇحباتىندا: «قازىر مۇراگەر حانزادا بارلىق ءىستى باقىلاۋدا ۇستاپ وتىر. سوندىقتان بۇل ىسكە دە سول جاۋاپتى بولۋى كەرەك»، – دەگەن.

پرەزيدەنت ترامپ سەيسەنبى كۇنى جۋرناليستەرگە بەرگەن جاۋابىندا: «ساۋد ارابياسى ۇكىمەتى حاشوگگيدىڭ ءولتىرىلۋ ىسىندە تاريحتاعى «ەڭ جيىركەنىشتى ارەكەتتى جوسپارلادى». ولاردىڭ باستاپقى بەينەسى دە، قادامدارى دا تىم ناشار بولدى. بۇل تاريحتاعى ەڭ ناشار بۇركەنىش ارەكەت. ولاردىڭ بۇركەنىشى دە، ونى ورىنداۋى دا وتە تومەن دەڭگەيدە بولدى. ارينە، ەڭ جاقسىسى بۇل ءىستىڭ بولماعانى دۇرىس ەدى»، – دەگەن.

سارسەنبى كۇنى، قۇراما شتاتتار مەن بىرىككەن كورولدىك حاشوگگي ىسىنە قاتىسى بار دەگەن ادامداردىڭ ۆيزاسىن الىپ تاستادى. سونداي-اق، اقش جانە وزگە دە باتىس ەلدەرى ساۋد ارابياسىنا قارۋ-جاراق ساتۋدى قىسقارتۋدان تارتىپ، باسقا دا جازالاۋ شارالارى تۋرالى ويلاستىرا باستادى.

دەگەنمەن، اقش پرەزيدەنتى حاشوگگي ىسىنە بايلانىستى ءوزىنىڭ ماڭىزدى وداقتاسىنان بەت بۇرمايتىنىن دا بايقاتتى. جالپى، باتىس ەلدەرى مەن ساۋد ارابياسىنداعى بايلانىستىڭ قانداي باعىتقا قاراي ءوربيتىنى الداعى ۋاقىتتا وسى ەلدەردىڭ ساۋد بيلىگىنە باعىتتايتىن سانكتسيا شارالارىنا بايلانىستى بولماق.

 “The Qazaq Times”